दिल्ली विमानस्थलको छत भत्किँदा एक जनाको मृत्यु ,चार जना घाइते

काठमाडौँ  , १४ असार –  भारी वर्षापछि दिल्ली एयरपोर्टको छाना खस्दा एक जनाको मृत्यु भएको छ भने चार जना घाइते भएका छन् । घटना आज बिहान ५ बजे भएको थियो । बिबिसीका अनुसार टर्मिनलको छत त्यहाँ रहेको ट्याक्सी र कारमाथि खसेको हो। कार र ट्याक्सीमा रहेका केही मानिसहरू घाइते भएका हुन्।

छतलाई अड्याएर राखिएको बिमसमेत भत्किँदा त्यहाँ पिक अप र ड्रप गर्न आएका गाडीहरू समेत दुर्घटना भएका छन्। विमानस्थलमा उद्धार कार्य जारी छ भने घाइतेहरुको अस्पतालमा उपचार भइरहेको छ ।

भारतको उड्डयन नियामकले एयरलाइन्सहरूलाई वैकल्पिक उडानहरूमा यात्रुहरूलाई समायोजन गर्न वा तिनीहरूलाई फिर्ता प्रस्ताव गर्न सल्लाह दिएको छ। संघीय उड्डयन मन्त्री राममोहन नायडू किञ्जरापुले मृतकका परिवारलाई २० लाख रुपैयाँ र घाइतेलाई ३ लाख रुपैयाँ क्षतिपूर्ति दिने घोषणा गरेका छन् ।

उनले अवस्था नियन्त्रणमा रहेको र थप घटना हुन नदिन अनुगमन भइरहेको पनि पत्रकारहरुलाई बताए । उनले देशभरका थप संरचना भएका विमानस्थलको पनि निरीक्षण गरिने बताए ।
यो घटनाको सामाजिक सञ्जालमा आलोचना भएको छ । यो टर्मिनलको अरबौं रुपैयाँको लागतमा ठूलो मर्मत गरिएको र हालैको आम चुनाव सुरु हुनुभन्दा एक महिना अघि मार्चमा प्रधानमन्त्री नरेन्द्र मोदीले उद्घाटन गरेका थिए ।