पूर्वसभामुख ढुंगानाको निधनमा कांग्रेसले आज र भोलि केन्द्रीय कार्यालयमा झण्डा आधा झुकाउने

काठमाडौँ , ३ मसिर । नेपाली कांग्रेसले पूर्वसभामुख दमननाथ ढुंगानाको निधनप्रति शोक व्यक्त गर्दै मंसिर ३ र ४ गते दुई दिनसम्म पार्टीको केन्द्रीय कार्यालयमा झण्डा आधा झुकाउने निर्णय गरेको छ।

यसैगरी, २०८१ मंसिर ४ गते मंगलबारका दिन पार्टीको केन्द्रीय कार्यालय बन्द राख्ने र ढुंगानाको स्वर्गारोहणको १३ औं दिनमा शोक सभा आयोजना गर्ने निर्णयसमेत गरिएको छ। नेपाली कांग्रेसको आजको आकस्मिक केन्द्रीय समितिको बैठकले शोक प्रस्ताव पारित गर्दै यी निर्णयहरू गरेको हो। बैठक पार्टीको केन्द्रीय कार्यालय, बी.पी. स्मृति भवन, ललितपुरमा बिहान १०:३० बजे बसेको थियो।

पूर्वसभामुख ढुंगानाले केही समयदेखि कलेजोसँग सम्बन्धित समस्याका कारण उपचार गरिरहेका थिए। ८३ वर्षका ढुंगानाको आइतबार दिउँसो बानेश्वरस्थित फ्रन्टलाइन अस्पतालमा निधन भएको थियो। उनका निधनपछि अहिले सानो गौचरणमा सर्वसाधारणले श्रद्धाञ्जली अर्पण गरिरहेका छन्। श्रद्धाञ्जलीका अवसरमा पशुपति आर्यघाटमा उनको अन्त्येष्टि गरिनेछ।