बैतडीमा लगातार वर्षाका कारण राति सवारी सञ्चालनमा रोक,सतर्कता अपनाउन आग्रह

काठमाडौँ । बैतडीमा लगातारको झरीले बाढी, पहिरो जस्ता विपद् आउने जोखिम बढेकाले जिल्ला प्रशासनले सबैलाई सजग रहन भनेको छ। प्रमुख जिल्ला अधिकारी पुण्यविक्रम पौडेलका अनुसार, आकस्मिक काम नपरीकन यात्रा नगर्न, जोखिमयुक्त ठाउँमा नबस्न र खोलानाला आसपास नजान आग्रह गरिएको छ।

रातको समयमा बाढी र पहिरोको सम्भावना भएकाले राजमार्ग र सहायक सडकमा सवारी साधन चलाउन रोक लगाइएको छ। जिल्ला प्रहरी कार्यालयले पनि बाटो अवरुद्ध हुन सक्ने भएकाले गाडी चलाउँदा वा बाहिर जाँदा सावधानी अपनाउन भनेको छ।

महाकाली नदीको पानीको सतह बढेकाले नदी आसपासका बस्तीमा खतरा देखिएको छ। तीन दिनदेखि लगातार परिरहेको वर्षाले जनजीवन अस्तव्यस्त बनेको छ।