
काठमाडौँ – सत्तारुढ नेपाली कांग्रेसको केन्द्रीय कार्यसमितिको बैठक आज बस्दैछ। बैठकले पार्टीको आगामी रणनीति र सङ्गठन सुदृढीकरणका विषयमा छलफल गर्नेछ। पार्टी सभापति एवम् पूर्वप्रधानमन्त्री शेरबहादुर देउवाको बूढानीलकण्ठस्थित निवासमा बसेको पदाधिकारी तथा पूर्वपदाधिकारी बैठकले आजको बैठकका एजेण्डा तय गरिसकेको छ।
कांग्रेस प्रवक्ता डा. प्रकाशशरण महतका अनुसार बैठकमा गठबन्धन सरकारको कार्यसम्पादन, भ्रातृ संस्थाको अवस्था, पार्टीको सक्रिय सदस्यता वितरण र नवीकरणबारे छलफल हुनेछ। यस्तै, संघीय तथा प्रदेश सरकारका मन्त्रीहरूले आ–आफ्नो कार्यक्षेत्रको प्रगति बारे केन्द्रीय कार्यसमितिमा जानकारी गराउनेछन्।
बैठकमा गठबन्धन सरकारको प्रभावकारिता र पार्टीको भावी रणनीतिका विषयमा समेत गहन छलफल हुनेछ। महतका अनुसार, महाधिवेशन समयमा गर्न नसकेका भ्रातृ संस्थाहरूको तदर्थ समिति विस्तार वा म्याद थपबारे निर्णय लिने सम्भावना छ। महामन्त्रीद्वारा सक्रिय सदस्यता वितरणको प्रगति विवरण पनि बैठकमा प्रस्तुत गरिनेछ।
आजदेखि सुरु भएको यो बैठकले कांग्रेसको आन्तरिक एकता, संगठन सुदृढीकरण तथा गठबन्धन प्रभावकारिता बढाउन महत्त्वपूर्ण भूमिका खेल्ने अपेक्षा गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे