सगरमाथा आरोही बुढामगरलाई पर्यटनमन्त्री किरातीद्धारा काठमाडौँमा भव्य स्वागत

काठमाडौँ, ९ जेठ । दुबै खुट्टा नभएर पनि सगरमाथाको सफल आरोहण गरेर काठमाडौँ फर्किएका हरिबहादुर बुढामगरलाई पर्यटनमन्त्री सुदन किरातीले स्वागत गरेका छन्।

रोल्पा थवाङका ३८ वर्षीय बुढालाई पर्यटनमन्त्रि किराती लगायत पर्यटन व्यवसायी, आफन्तका साथै मगर समूदायले झाँकीसहित काठमाडौँमा उनलाई स्वागत गररेको हो ।

सगरमाथा चढेर विश्व कीर्तिमान कायम गरि आज काठमाडौं फर्किँदा मगरको सम्मानमा विमानस्थलमा सयौं भेला भएका थिए ।

उनले शुक्रबार दिउँसो सगरमाथा आरोहण गरेका थिए।

बेलायती सेनामा जागिर खाने क्रममा ८ वर्षअघि अफगानिस्तानस्थित हेलमान प्रान्तको आक्रमणमा परी बुढाले दुबै खुट्टा गुमाएका थिए। उनले यसअघि २०१६ मा सूर्य कुण्ड हिमाल नेपाल, बेन नेभिस स्कटल्याण्ड, माउन्ट ब्ल्याडक फ्रान्स हुँदै नेपालको थोराङलापाससम्म पुगिसकेका छन्।

अपांगता भएकाहरु असक्षम हुँदैनन् भन्ने देखाउनको लागि आफूले सगरमाथा चढेको उनले बताए।

मन्त्री किरातीले दुवै खुट्टा नभएर पनि अदम्य साहस, अथक मिहेनतले विश्व शिखरमा सफल आरोहण गर्न सफल भएको भन्दै बुढामगरलाई उच्च सम्मान गरेको बताए ।