श्रमिकको न्यूनतम तलब १९ हजार ५५० रुपैयाँ

काठमाडौं । सरकार, रोजगारदाता र ट्रेड युनियनबीचको त्रिपक्षीय सहमतिपछि चिया बगानबाहेकका क्षेत्रमा कार्यरत श्रमिकको न्यूनतम तलब १९ हजार ५५० रुपैयाँ निर्धारण गरिएको छ। सो निर्णय साउन १ गतेदेखि लागू भइसकेको छ।

नयाँ व्यवस्था अनुसार श्रमिकको मासिक पारिश्रमिकमा आधारभूत तलब १२ हजार १७० रुपैयाँ र महङ्गी भत्ता ७ हजार ३८० रुपैयाँ समावेश गरिएको छ। यसअघिको तुलनामा यो तलब २ हजार २५० रुपैयाँले वृद्धि भएको हो। विगतमा चियाबगानबाहेकका श्रमिकको न्यूनतम पारिश्रमिक १७ हजार ३०० रुपैयाँ थियो।

यस निर्णयसँगै दैनिक ज्यालादारीमा काम गर्ने श्रमिकका लागि न्यूनतम पारिश्रमिक ७५४ रुपैयाँ तोकिएको छ। यसमा आधारभूत ४७० रुपैयाँ र महङ्गी भत्ता २८४ रुपैयाँ समावेश छ।

त्यस्तै, आंशिक रुपमा काम गर्ने श्रमिकका लागि प्रतिघण्टाको न्यूनतम पारिश्रमिक १०१ रुपैयाँ निर्धारण गरिएको छ, जसमा आधारभूत तलब ६३ रुपैयाँ र महङ्गी भत्ता ३८ रुपैयाँ रहेको छ।

चियाबगान क्षेत्रका श्रमिकका लागि भने न्यूनतम पारिश्रमिकबारे अझै सम्बन्धित पक्षसँग छलफल जारी रहेको सरकारको भनाइ छ।