बंगलादेशको अन्तरिम सरकारका सदस्यले आज शपथ लिने

एजेन्सी । बंगलादेशमा गठन हुने अन्तरिम सरकारका सदस्यहरुले आज शपथ ग्रहण गर्ने तयारी भइरहेको छ । सरकार विरोधी प्रदर्शनमा सयौंको ज्यान गएपछि प्रधानमन्त्री शेख हसिनाले राजीनामा दिएर देश छाडेकी छन् ।

हसिनाले प्रधानमन्त्रीबाट राजीनामा गर्दै देश छाडेलगत्तै नोबल पुरस्कार विजेता युनुस मंगलबार त्यहाँको अन्तरिम सरकार प्रमुख नियुक्त भएका थिए। बीबीसीका अनुसार अन्तरिम सरकार प्रमुख नियुक्त हुँदा उनी फ्रान्सको पेरिसमा थिए। पेरिसबाट बिहीबार दिउँसोसम्ममा ढाका आउने र बेलुका अन्तरिम सरकार प्रमुखको शपथ लिने कार्यक्रम रहेको छ ।

सल्लाहकार परिषद् १५ सदस्यीय हुने सम्भावना रहेको सेना प्रमुखको भनाइ छ । सेना प्रमुख वाकरले तीनदेखि चार दिनभित्र बङ्गलादेशको परिस्थिति सामान्य हुने पनि दाबी गर्ने छन् ।

बंगलादेशमा प्रहरी र सरकार विरोधी प्रदर्शनकारीबीच भएको झडपमा कम्तीमा ९० जनाको मृत्यु भएको छ भने सयौं घाइते भएका छन् ।देशको लामो समय सेवा गरिरहेकी प्रधानमन्त्री शेख हसिनालाई पदबाट हटाउन माग गर्न विद्यार्थी नेताहरूले सविनय अवज्ञाको अभियान घोषणा गरेपछि अशान्ति भएको हो। मृत्यु हुनेको संख्यामा कम्तिमा १३ प्रहरी अधिकारीहरू रहेका छन् ।