प्रसारण लाइनमुनिको जग्गा कित्ताकाट गर्न पाइने

काठमाडौँ — सरकारले विद्युतीय प्रसारण लाइनको तारमुनि पर्ने जग्गालाई पनि कित्ताकाट गर्न पाउने व्यवस्था गरेको छ। भूउपयोग नियमावली, २०७९ को तेस्रो संशोधनमार्फत यस्तो कानुनी व्यवस्था लागू गरिएको हो, जसअनुसार प्रसारण लाइनको ‘राइट अफ वे’ क्षेत्रमा पर्ने जग्गाको स्वामित्व जग्गाधनीकै नाममा राखेर कित्ताकाट गर्न सकिनेछ। यो व्यवस्था गत २७ कात्तिकदेखि कार्यान्वयनमा आइसकेको छ।

नयाँ नियमअनुसार कित्ताकाट गर्न पाइए पनि सुरक्षासम्बन्धी मापदण्ड भने परिवर्तन भएका छैनन्। प्रसारण लाइनमुनि घर बनाउन, अग्ला रुख रोप्न वा जोखिमयुक्त काम गर्न पाइँदैन। राइट अफ वेको चौडाइ लाइनको भोल्टेजअनुसार तोकिएको हुन्छ। यसअघि कित्ताकाट नपाउँदा जग्गाधनीले नामसारी, धितो राख्न वा कारोबार गर्न समस्या भोग्दै आएका थिए। अब भने जग्गाको कानुनी प्रयोग सहज हुने र आर्थिक समस्या कम हुने अपेक्षा गरिएको छ।