काठमाडौँ महानगरपालिका र खाद्य प्रविधि विभागबीच खाद्य स्वच्छता र गुणस्तर सुधारको लागि सहमति पत्रमा हस्ताक्षर

काठमाडौँ । काठमाडौँ महानगरपालिका र खाद्य प्रविधि तथा गुण नियन्त्रण विभागबीच खाद्य व्यवसायलाई स्वच्छ, ताजा र गुणस्तरीय बनाउने उद्देश्यले सहमति पत्रमा हस्ताक्षर भएको छ। यस सहमति अनुसार, खाद्य व्यवसायको अनुगमन र खाद्य नमूनाको परीक्षणबाट खाद्य स्वच्छता र गुणस्तर कायम गर्ने सहकार्य सुरु गरिएको छ।

महानगरपालिकाका प्रमुख प्रशासकीय अधिकृत नुरनिधि न्यौपाने र खाद्य प्रविधि तथा गुण नियन्त्रण विभागका महानिर्देशक सञ्जीवकुमार कर्णले विभागको सभा कक्षमा आयोजित कार्यक्रममा सहमति पत्रमा हस्ताक्षर गरेका हुन्। यस सहमतिले संयुक्त अनुगमन र निरीक्षणका लागि घुम्ती खाद्य प्रयोगशालाको सञ्चालन गर्ने व्यवस्था गरेको छ। महानगरपालिकाले यसका लागि आवश्यक साधन स्रोतको व्यवस्था गर्ने जनाएको छ भने अन्य व्यवस्थापन संयुक्त रूपमा हुनेछ।

संयुक्त अनुगमन र निरीक्षण टोलीमा घुम्ती खाद्य प्रयोगशाला, खाद्य प्राविधिक, माइक्रोबायोलोजिष्ट र विज्ञहरू समावेश गरिएको छ। यसका साथै, अनुगमन र निरीक्षण सम्बन्धी कार्ययोजना दुवै पक्षको सहभागितामा निर्धारण गरिनेछ। महानगरपालिकाका फुड टेक्नोलोजिष्ट, माइक्रोबायोलोजिष्ट र अन्य कर्मचारीहरूलाई विभागले क्षमता विकास गराउनेछ।

सहमति पत्रमा हस्ताक्षर गरेपछि महानिर्देशक कर्णले काठमाडौँमा थोरै लगानी भएका खाद्य सेवा स्थलहरू हुन् वा ठूलो लगानीमा सञ्चालित खाद्य सेवा स्थलहरू हुन्, दुवैबाट उपभोक्ताले स्वच्छ र गुणस्तरीय खाद्य पाउने वातावरण सिर्जना हुने विश्वास व्यक्त गरेका छन्। उनले स्थानीय तहले आफैं खाद्य प्रयोगशाला स्थापना गर्न र अनुगमन, परीक्षण र नियमन गर्न सक्ने अधिकार दिइएको खाद्य स्वच्छता तथा गुणस्तर ऐन, २०८१ को प्रावधानलाई उल्लेख गर्दै महानगरपालिकाले यस क्षेत्रमा काम गर्न सक्ने क्षमता राखेको बताए। विभागले प्राविधिक सहयोग उपलब्ध गराउनेछ भन्ने उनले जनाए।

महानगरपालिकाका प्रमुख प्रशासकीय अधिकृत न्यौपानेले सहकार्यका विषयमा धारणा राख्दै नीति, कार्यक्रम र बजेटबाट छुट्टाछुट्टै वा एकीकृत रूपमा सहकार्य हुन सक्ने बताए। उनले महानगरपालिकाले खाद्य स्वच्छता परीक्षणका लागि प्रयोगशाला स्थापना गर्न लागेको जानकारी दिए।

यस कार्यक्रममा महानगरपालिकाको प्रशासन विभागका प्रमुख ध्रुवकुमार काफ्ले, खाद्य स्वच्छता तथा गुणस्तर कार्यक्रमका विज्ञ सल्लाहकार जीवनप्रभा लामा, कार्यक्रमका सल्लाहकार सन्तोष गिरी, विभागका वरिष्ठ खाद्य अनुसन्धान अधिकृतसहित अन्य पदाधिकारीहरू उपस्थित थिए।

खाद्य स्वच्छता तथा गुणस्तर ऐन, २०८१ ले विभागलाई प्रदेश सरकार र स्थानीय तहबाट हुने खाद्य व्यवसायको निरीक्षण र अनुगमनमा सहयोग तथा सहजीकरण गर्ने दायित्व दिएको छ। काठमाडौँ महानगरपालिकाले उपभोक्ताहरूको गुणस्तरीय र सुलभ खाद्य अधिकार सुरक्षाका लागि नियमित खाद्य सेवाको अनुगमन गरिरहेको छ भने खाद्य व्यवसायीहरूलाई स्वच्छता सम्बन्धी क्षमता विकास तालिम प्रदान गरिरहेको छ।