फोनमार्फत धम्की दिने महिलाप्रति मेरो पूर्वाग्रह छैनःखानेपानीमन्त्री यादव

काठमाडौं । खानेपानीमन्त्री प्रदीप यादवले आफूलाई फोनमार्फत धम्की दिने महिलाप्रति कुनै व्यक्तिगत पूर्वाग्रह नरहेको स्पष्ट पारेका छन्। हाल पर्सा प्रहरीको हिरासतमा रहेकी ती महिलासम्बन्धी घटनामा आफूलाई जोड्न नहुने मन्त्री यादवले बताएका छन्।

मन्त्री यादवले फेसबुकमा लेखेका छन्, “समस्या प्रश्न गर्नुमा होइन, तर हिंसात्मक भावना व्यक्त गर्दा यस्तो स्थिति सिर्जना भएको हो। फोनकर्ता महिलालाई प्रहरीले थुनेको विषयमा मलाई नजोड्नु होला।”

उनले ती महिलाले आफ्ना आफन्त बिरामी परेपछि आक्रोश पोखेको हुन सक्ने अनुमान गरे पनि घटनाको वास्तविकता त्यसअनुरूप नदेखिएको उल्लेख गरेका छन्। “प्रश्न गर्नु गलत होइन, तर धम्कीपूर्ण शैली अपनाउनुले यो अवस्था आएको हो,” मन्त्रीले स्पष्ट पारेका छन्।

वीरगञ्जमा हैजा फैलिएपछि ती महिलाले मन्त्री यादवलाई फोन गरी आक्रोशपूर्ण शब्द प्रयोग गर्दै धम्की दिएकी थिइन्। उक्त अडियो सामाजिक सञ्जालमा भाइरल भएको थियो। त्यसपछि शनिवार पर्सा प्रहरीले उनलाई पक्राउ गरेको हो।

यादवले लेखेका छन्, “पर्सा प्रहरीले आफ्नो अनुसन्धान अगाडि बढाउँदै गर्दा ती महिला हिरासतमा परेकी हुन्। मेरो तर्फबाट कुनै पूर्वाग्रह छैन। एक जनप्रतिनिधिमाथि रिस पोखिएको कुरालाई सामान्य रुपमा लिएको छु, तर ममाथि अनाहक अफवाह फैलाउने, ज्यान मार्ने खालको धम्की आएको हुँदा मेरा आफन्त, समर्थकहरू चिन्तित हुनु स्वाभाविक हो।”