युवालाई वित्तीय साक्षरताको पाठ, बैंक नेतृत्वको सहभागितासहित अभियान सुरु

काठमाडौँ। युवामाझ वित्तीय ज्ञान, बचत संस्कार र जिम्मेवार आर्थिक व्यवहार प्रवर्द्धन गर्ने उद्देश्यले मनाइने विश्व वित्तीय सप्ताह आजदेखि सुरु भएको छ। सात दिनसम्म सञ्चालन हुने यो अभियान चैत २ गतेसम्म विभिन्न कार्यक्रमसहित मनाइदैछ। यस वर्षको अभियानको मूल सन्देश “स्मार्ट मनी टक्स” रहेको छ, जसले युवालाई वित्तीय साक्षरता, डिजिटल बैंकिङबारे सचेतना र जिम्मेवार आर्थिक निर्णयतर्फ प्रेरित गर्ने लक्ष्य राखेको छ।

आर्थिक सहयोग तथा विकास संगठनको नेतृत्वमा सञ्चालन हुने यस अभियानअन्तर्गत नेपालसहित विश्वका विभिन्न देशमा बैंक तथा वित्तीय संस्थाहरूले विद्यार्थी र युवालाई लक्षित गर्दै वित्तीय साक्षरता कार्यक्रम, बचतसम्बन्धी सचेतना र आधुनिक बैंकिङ सेवाबारे जानकारी दिने गतिविधि सुरु गरेका छन्। नेपालमा पनि वाणिज्य बैंक, विकास बैंक तथा अन्य वित्तीय संस्थाहरूले शाखास्तरमा विद्यालय र क्याम्पसमा वित्तीय शिक्षा कार्यक्रम आयोजना गर्न थालेका छन्।

यस अवसरमा विभिन्न कार्यक्रममा नेपाल राष्ट्र बैकको गभर्नर,बैक निर्देशन,विभाग प्रमुख, बैंक तथा वित्तीय संस्थाका प्रमुख कार्यकारी अधिकृत, उच्च व्यवस्थापक, विभागीय प्रमुख तथा वरिष्ठ पदाधिकारी पूँजी बजार प्रतिनिधिहरूको उल्लेख्य सहभागिता रहेको छ। उनीहरूले युवालाई जिम्मेवार आर्थिक व्यवहार अपनाउन, बचत संस्कार विकास गर्न र आधुनिक वित्तीय सेवाको सही प्रयोग गर्न प्रेरित गरेका छन्।

अभियान सञ्चालनका लागि आवश्यक मार्गदर्शन सामग्री र कार्यक्रम सञ्चालन पुस्तिका विभिन्न भाषामा उपलब्ध गराइएको छ। केही बैंकहरूले सामाजिक सञ्जालमार्फत दैनिक बचतका उपाय, जिम्मेवार खर्च र वित्तीय अनुशासनबारे जानकारी दिने अभियानसमेत सुरु गरेका छन्।

विशेषज्ञहरूका अनुसार सानै उमेरदेखि वित्तीय ज्ञान प्रदान गर्न सके भविष्यमा आर्थिक रूपमा जिम्मेवार र आत्मनिर्भर नागरिक तयार पार्न सहयोग पुग्ने विश्वास गरिएको छ।