परराष्ट्रमन्त्री देउवाद्धारा विपिन जोशीको रिहाइका लागि कतारसँग सहयोगको आग्रह

काठमाडौँ , ४ फागुन । परराष्ट्रमन्त्री डा। आरजु राणा देउवा र कतारका विदेश राज्यमन्त्री सुल्तान बिन साद बिन सुल्तान अल मुराइखीबीच मस्कटमा शिष्टाचार भेटवार्ता भएको छ। आठौँ हिन्द महासागरीय सम्मेलनमा सहभागिताका लागि मस्कटमा उपस्थित मन्त्रीहरूको बीचमा यो भेटवार्ता साइडलाइनमा भएको हो।

भेटमा, नेपाल र कतार बीचको द्विपक्षीय सम्बन्ध, विद्यार्थीहरूको छात्रवृत्ति, दक्ष प्राविधिक जनशक्ति, र अन्य पारस्पारिक हितका विषयमा छलफल भएको थियो। साथै, मन्त्री डा। देउवाले हमासको नियन्त्रणमा रहेका नेपाली युवा विपिन जोशीको रिहाइका लागि मन्त्री मुराइखीसँग सहयोगको आग्रह गरेका छन् । उनले कतार सरकारले इजरायल र हमास बीचको मध्यस्थता गरेर युद्धविराम र शान्तिवार्ता प्रयासको प्रशंसा गर्दै विपिनको रिहाइका लागि विशेष पहल गर्न आग्रह गरिन्।

गत वर्षदेखि नेपाल सरकारले विपिनको रिहाइका लागि कूटनीतिक प्रयास गर्दै आएको छ। मन्त्री डा। देउवाले संयुक्त राष्ट्रसंघ र अन्य अन्तर्राष्ट्रिय मञ्चहरूमा पनि यस विषयमा आवाज उठाउँदै आएका छन्। सन् २०२३ को अक्टोबरमा हमासले विपिनलाई अपहरण गरेका थिए।