कञ्चनपुरमा विषालु च्याउ खाँदा एकै परिवारका पाँच जना बिरामी

काठमाडौँ । कञ्चनपुरको दोधारा–चाँदनी नगरपालिका–६, कालागडमा विषालु च्याउ खाँदा एकै परिवारका पाँच जना बिरामी भएका छन्। ६३ वर्षीया कालु सुनार र उनका नाति–नातिनीहरूले भारतको नङ्ग्रा जंगलबाट ल्याएको च्याउको तरकारी खाएका थिए। त्यसपछि सबैको स्वास्थ्य बिग्रिएको जिल्ला प्रहरी कार्यालय कञ्चनपुरका प्रवक्ता डिएसपी सागर बोहराले जानकारी दिए।

बिरामी पर्नेमा कालु सुनारसँगै १८ वर्षीया नातिनी निशा सुनार, १६ वर्षीया नाति भीम सुनार, १२ वर्षीया वसन्त सुनार र ८ वर्षीया मन्सु सुनार रहेका छन्। “विषालु च्याउको कारण पेट दुख्ने, वाकवाकी लाग्ने, कमजोरी हुने जस्ता समस्या देखिएपछि सबैलाई दोधारा–चाँदनी अस्पतालमा भर्ना गरिएको छ,” डिएसपी बोहराले भने।

हाल पाँचै जनाको अस्पतालमा उपचार भइरहेको छ र अवस्था खतरामुक्त रहेको जनाइएको छ। प्रहरीले जंगली च्याउ खाने बेला सावधानी अपनाउन आग्रह गरेको छ।