फेरि फैलियो लस एन्जलसमा डढेलो

काठमाडौँ,१० माघ । लस एन्जलसको उत्तरमा बुधबार नयाँ जंगलमा लागेको आगो व्यापक रूपमा फैलियो र हजारौं मानिसहरूलाई आफ्नो घरहरू खाली गर्न बाध्य बनाएको छ। आगोको जोखिम क्षेत्रमा रहेका हजारौं व्यक्तिहरुलाई फेरि पनि सुरक्षित स्थानमा सारिएको छ । तीव्र हावा र सुख्खा झाडीका कारण डढेलो फैलिरहेको छ । आगोको ज्वाला बढ्दै गएपछि यस क्षेत्रमा बसोबास गर्ने मानिसहरू हतारमा घर छाड्न बाध्य भएका छन्।केही दिनअघि मात्र लस एन्जलसको जंगलमा लागेको आगलागीले लस एन्जलसको ठूलो भागमा ठूलो क्षति पुर्याएको छ साथै उक्त आगलागीमा २४ जनाभन्दा बढीको मृत्यु भएको थियो भने अर्बौंको नोक्सानी भएको थियो।

सयौँ घरहरू ध्वस्त भएका छन्, गाडीहरू जलेका छन्, र एटीएम काउन्टरहरू नष्ट भएका छन्। हावाहुरीले रूखहरू ढलेका छन्, र आकाश धुवाँ र खरानीले ढाकिएको छ। अधिकारीहरूले स्थानीय स्वास्थ्य आपतकाल घोषणा गरेका छन्, र वायुको गुणस्तर प्रदूषित भएको बताएका छन्।

दसौँ हजार मानिसलाई सुरक्षित स्थानमा सारिएको छ र दुई लाख घरधुरीमा विद्युत् आपूर्ति अवरुद्ध भएको छ। हजारौं अग्निनियन्त्रकहरूले आगो निभाउन प्रयासरत छन्, यद्यपि धेरै स्थानमा आगो अझै नियन्त्रणमा आएको छैन। क्यानडा सरकार आगो निभाउन सहायता पुर्‍याउन अघि आएको छ।