ईक्यान लिडर्स मिट २०२५ सम्पन्न, शाखा सशक्तिकरण र नेतृत्व विकासमा केन्द्रित

सिमरा, बारा । शिक्षा परामर्श क्षेत्रको अग्रणी संस्था ईक्यान (ECAN) को लिडर्स मिट २०२५ भव्य रूपमा सम्पन्न भएको छ। ईक्यान मकवानपुरको आयोजनामा सिमरा, बारामा सम्पन्न तीनदिने राष्ट्रिय भेलाको समापन ईक्यान केन्द्रीय अध्यक्ष श्री सेशराज भट्टराईको मन्तव्यसँगै सम्पन्न भएको हो।

समापन समारोहमा अध्यक्ष भट्टराईले यो वर्षको लिडर्स मिटको मूल उद्देश्य शाखा सशक्तिकरण, रणनीतिक समन्वय र संस्थागत क्षमता अभिवृद्धि रहेको प्रष्ट पारे। उनले यस अभियानलाई नेतृत्व दिएको शाखा समन्वय विभाग र विभाग प्रमुख कार्यसमिति सदस्य श्री मञ्जित ढकालको खुलेर प्रशंसा गरे। उनका अनुसार, देशभरका शाखा अध्यक्षहरूले देखाएको दृढ नेतृत्व र प्रतिबद्धताले ईक्यानलाई राष्ट्रिय रूपमा प्रभावशाली र अन्तर्राष्ट्रिय स्तरमा सम्मानित संस्था बनाएको छ।

कार्यक्रममा वर्ष २०२५ भित्र विशिष्ट योगदान पुर्‍याएका शाखाहरू र नेताहरूलाई सम्मान तथा पुरस्कार प्रदान गरिएको थियो। अध्यक्ष भट्टराईले केन्द्रीय कार्यसमिति, विगतका अध्यक्षहरू, सल्लाहकारहरू र समर्पित सदस्यहरूप्रति विशेष धन्यवाद प्रकट गर्दै ईक्यानको निरन्तर यात्रा सहकार्य र मूल्यमा आधारित रहेको उल्लेख गरे।

कार्यक्रममा प्रेरणा, व्यवसायिक प्रशिक्षण, नैतिक नेतृत्व, ज्ञान आदानप्रदान र सक्रिय सदस्यहरूको अन्तरक्रिया जस्ता बहस तथा कार्यशालाहरू आयोजना गरिएको थियो। १०० भन्दा बढी शाखा प्रतिनिधिहरूको उपस्थितिले कार्यक्रमलाई ऐतिहासिक बनाएको आयोजकले जनाएको छ।

कार्यक्रमको एक विशेष सत्रमा ईक्यानका तत्कालीन अध्यक्ष (IPP) श्री प्रकाश पाण्डेले “ईक्यान मार्गदर्शिका, आचारसंहिता र सीमाहरू” विषयमा व्याख्या गरे। उनले डिजिटल युगमा इमान्दार प्रवर्द्धन, सामाजिक सञ्जालको सचेत प्रयोग र झुटा दावीहरूबाट परहेज गर्न आग्रह गरे। उनले स्पष्ट भने, “ईक्यान केवल नेटवर्क होइन—यो विद्यार्थीको सुरक्षाको ढाल हो।” पाण्डेले ईक्यानको आचारसंहिताले संस्था र पेशाको पारदर्शिता, विश्वसनीयता र पेशागत मूल्य थप सुदृढ बनाएको बताए।

त्यसैगरी, केन्द्रीय महासचिव श्री दीपकराज भूषालले “From the Ground Up: My Journey in ECAN Leadership” शीर्षकमा आफ्नो १५ वर्षे नेतृत्व अनुभव साझा गरे। उनले प्रारम्भिक संलग्नता देखिनै केन्द्रीय भूमिकासम्मको यात्रा, चुनौती र सिकाइहरू प्रस्तुत गर्दै टीमवर्क, दीर्घकालीन सोच र निष्ठा नै संस्थागत सफलताको आधार रहेको बताए।

कार्यक्रममा नेपाल शैक्षिक परामर्शदाता उद्यमी महासङ्घ (FECE) का अध्यक्ष श्री राजेन्द्र बरालले “सशक्त नेतृत्व निर्माण र महासङ्घको भूमिका” विषयमा मन्तव्य राख्दै संघीय समन्वय, साझा दृष्टिकोण र नीतिगत पहललाई महत्व दिए। FECE भित्रको एकता र उद्देश्यमा आधारित पहलले शैक्षिक परामर्श क्षेत्रमा थप मर्यादा र पेशागतपन ल्याउने उनको विश्वास थियो।

कार्यक्रमको प्रमुख वक्ताको रूपमा आमन्त्रित माननीय मनीष झाले “नैतिकता, जवाफदेहिता र विद्यार्थीमुखी नेतृत्व” को आवश्यकतालाई जोड दिए। उनले ईक्यानजस्तो संस्थाले शिक्षा प्रणालीमा सुधार र विश्वसनीयता स्थापनामा महत्वपूर्ण भूमिका खेलिरहेको बताए। झाका अनुसार, नेतृत्व केवल पद होइन, दृष्टिकोण र मूल्यमा आधारित कार्यसंस्कृति हो जुन विद्यार्थी हितमा केन्द्रित हुनुपर्छ।

ईक्यान लिडर्स मिट २०२५ ले संस्थागत प्रतिबद्धता, साझा दृष्टिकोण र प्रेरणास्रोत नेतृत्वको सन्देश दिएको सहभागीहरूको धारणा रहेको छ।