वीरगञ्ज, पर्सा । वीरगञ्ज भन्सार कार्यालयले चालु आर्थिक वर्ष २०८१/८२ को ११ महिनामा सबैभन्दा धेरै राजस्व पेट्रोलियम पदार्थको आयातबाट संकलन गरेको छ। कार्यालयले पेट्रोलियम आयातबाट मात्रै रु ७३ अर्ब १८ करोड राजस्व संकलन गरेको जनाएको छ।
भन्सार प्रमुख प्रशासक दीपक लामिछानेका अनुसार यो संकलन कुल राजस्वको ४६.४३ प्रतिशत हो। उक्त अवधिमा पाँच प्रकारका पेट्रोलियम पदार्थ आयात गर्न रु १ खर्ब ७४ अर्ब ९ करोड खर्च गरिएको थियो।
पेट्रोलियमपछिको दोस्रो ठूलो राजस्व स्रोत यातायातका साधन र तिनका पार्टपुर्जा हुन्। यसबाट भन्सारले रु १७ अर्ब ७० करोड राजस्व संकलन गरेको छ, जुन कुल राजस्वको ११.२३ प्रतिशत हो।
अन्य प्रमुख राजस्व योगदान दिने वस्तुहरूमा निम्न वस्तुहरू छन्ः
फलाम तथा फलामजन्य सामान : रु ५ अर्ब ७८ करोड
मेसिनरी तथा पार्टपुर्जा : रु ५ अर्ब २६ करोड
इलेक्ट्रिक मेसिनरी, उपकरण तथा पार्टपुर्जा : रु ३ अर्ब ६७ करोड
कपडा (सबै प्रकार) : रु ३ अर्ब ६ करोड
सुर्ती तथा सुर्तीजन्य पदार्थ : रु २ अर्ब ५८ करोड
शृङ्गार सामग्री : रु २ अर्ब ५२ करोड
प्लास्टिकका कच्चा पदार्थ : रु २ अर्ब ३२ करोड
लुब्रिकेटिङ्ग आयल : रु २ अर्ब १९ करोड
प्रमुख प्रशासक लामिछानेले वीरगञ्ज भन्सारको राजस्व संकलनमा पेट्रोलियम पदार्थ र सवारीसाधन आयात मुख्य आधार भएको स्पष्ट पारेका छन्। उनका अनुसार भन्सारको समग्र राजस्वमा यी वस्तुहरूको योगदान निर्णायक रहँदै आएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
