नेकपा एमालेको दोस्रो विधान महाधिवेशन तयारी अन्तिम चरणमा

काठमाडौं – नेकपा एमालेको दोस्रो विधान महाधिवेशन अबको चार दिनपछि सुरु हुँदैछ। महाधिवेशन ललितपुरको गोदावरीस्थित सनराइज हलमा भदौ २० देखि २२ गतेसम्म हुने तय भएको हो। पार्टी केन्द्रीय कार्यालयका अनुसार महाधिवेशनका तयारीका अधिकांश काम पूरा भइसकेका छन्।

स्थायी कमिटी सदस्य तथा प्रचार विभाग प्रमुख राजेन्द्र गौतमका अनुसार, दशौं राष्ट्रिय महाधिवेशनका प्रतिनिधिहरु नै यसपटकको विधान महाधिवेशनका प्रतिनिधि हुनेछन्। तर पार्टी छोडेका, निधन भएका वा कारबाहीमा परेका प्रतिनिधिहरु सूचिबाट हटाइएको छ। नयाँ प्रतिनिधि चयन गर्ने प्रावधान नभएकाले नयाँ सदस्यहरुलाई आयोजकको भूमिकामा मात्र राखिएको छ।

महाधिवेशनमा २ हजार ३४ जना प्रतिनिधिसहित २ हजार ३ सय ४९ जना सहभागी हुनेछन्। सबै प्रतिनिधिलाई निमन्त्रणा एसएमएसमार्फत पठाइसकिएको छ। मोबाइल नम्बर अद्यावधिक नभएकाहरुको लागि सम्बद्ध जिल्ला कमिटीमार्फत जानकारी दिन केन्द्रीय कार्यालयले निर्देशन दिएको छ।

महाधिवेशनको नारा ‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल, सुखी नेपाली हाम्रो गन्तव्य’ तय गरिएको छ। केन्द्रीय कार्यालय सचिव डा. भिष्म अधिकारीका अनुसार राजनीतिक, संगठनात्मक र विधान सम्बन्धी तीन प्रमुख प्रतिवेदनसहित निर्वाचन, अनुशासन, लेखा आयोग र सल्लाहकार परिषदका प्रतिवेदन पनि प्रस्तुत गरिनेछ।

प्रतिनिधिहरुका लागि डिजिटल परिचयपत्र तयार भइसकेको छ। सहभागीले प्रवेश गर्न क्यूआर कोड स्क्यान गर्ने व्यवस्था गरिएको छ। खाना र खाजाका लागि व्यांकेटसँग सम्झौता भइसकेको छ भने हल सजावट र मञ्च व्यवस्थापन कार्य पनि जारी छ।

जनवर्गीय संगठन र स्थानीय कमिटीहरुले स्वागत द्वार, झण्डा र ब्यानरमार्फत गोदावरीसम्मको मार्ग सजाउने काम गरिरहेका छन्। भक्तपुर जिल्ला कमिटीले जडिबुटीदेखि सूर्यविनायकसम्म १० वटा आकासे पुलमा ब्यानर टाँस्ने तयारी गरेको छ।

विधान महाधिवेशनको उद्घाटन पार्टी अध्यक्ष एवं प्रधानमन्त्री केपी शर्मा ओलीले गर्ने कार्यसूची तय भएको छ। सोमबार महासचिव शंकर पोखरेलको उपस्थितिमा बस्ने बैठकले अन्तिम कार्यक्रम टुंग्याउने तयारी भइरहेको पार्टी स्रोतले जनाएको छ।