अबुधावी, बेइजिङ, कायरो र कोपनहेगनमा मनाइयो संविधान दिवस,संविधान दिवसको अवसरमा नेपालका राजदूतावासमा विविध कार्यक्रम

काठमाडौँ । नेपालका विभिन्न राजदूतावासहरूले संविधान दिवसलाई विविध कार्यक्रमका साथ मनाएका छन्। अबुधाबी, बेइजिङ, कायरो र कोपनहेगनस्थित नेपाली नियोगले यस अवसरमा विशेष समारोह आयोजना गरेको प्रेस विज्ञप्तिमा उल्लेख गरिएको छ।

अबुधाबीस्थित नेपाली राजदूतावासले बिहीबार विशेष कार्यक्रम आयोजना गरेको जनाएको छ। राष्ट्रियगान र ज्ञात-अज्ञात सहिदहरूको सम्मानका साथ सुरु भएको कार्यक्रममा राजदूत तेजबहादुर क्षेत्री, कूटनीतिक कर्मचारी र तिनका परिवार, साथै संयुक्त अरब इमिरेट्समा रहेका विभिन्न नेपाली सङ्घसंस्थाका प्रतिनिधिहरूको उपस्थिति थियो।

राजदूत क्षेत्रीले संविधानले सुनिश्चित गरेका जनताका हक, अधिकार र लोकतान्त्रिक शासन प्रणालीको विकासमा सबैको दायित्व रहेको बताउँदै मुलुकमा दिगो शान्ति र समृद्धि कायम गर्नु पर्ने कुरा बताए।

बेइजिङस्थित नेपाली दूतावासका कार्यवाहक राजदूत सुरेन्द्रकुमार यादवले नयाँ संविधानले समानता र प्रजातान्त्रिक मूल्यहरूको स्थापनामा योगदान दिएको बताएका छन्। सो समारोहमा चिनियाँ परराष्ट्र मन्त्रालयका उच्च अधिकारी लिउ जिनसङको प्रमुख आतिथ्यमा विविध सांस्कृतिक कार्यक्रमको आयोजना गरिएको थियो।

कायरोमा पनि संविधान दिवस समारोह सम्पन्न भएको छ। इजिप्टको परराष्ट्र मन्त्रालयका सहायक विदेशमन्त्री अहमद शाहिनले दुई देशबीचको सहयोग विस्तारको विश्वास व्यक्त गरे। नेपालका राजदूत सुशीलकुमार लम्सालले नेपालको संविधानलाई देशको आधुनिक इतिहासमा महत्वपूर्ण मान्दै नेपाल र इजिप्टबीचको सम्बन्ध मजबुत हुने आशा व्यक्त गरे।

कोपेनहेगनस्थित नेपाली नियोगमा आयोजित कार्यक्रममा, नियोग प्रमुख सावित्रा ओलीले जनताद्वारा निर्वाचित प्रतिनिधिले संविधान बनाएको ऐतिहासिक दिनको महत्त्वको चर्चा गर्दै लोकतन्त्रको विकासमा संविधानको योगदानलाई उल्लेख गरे।

यी समारोहमा डेनमार्कका उच्च अधिकारी, कूटनीतिक नियोगका प्रमुख, अन्तर्राष्ट्रिय सङ्घसंस्थाका प्रतिनिधि र गैरआवासीय नेपालीहरूको उपस्थिति रहेको थियो।