जलवायु परिवर्तन हाम्रो समयको सबैभन्दा ठूलो चुनौती हो:प्रधानमन्त्री ओली

काठमाडौँ, जेठ २ — प्रधानमन्त्री केपी शर्मा ओलीले हिमाल जोगाउनु भनेको पृथ्वी, महासागर र मानवता जोगाउनु हो भन्ने सन्देश फैलाउन सगरमाथा संवाद सुरु गरिएको बताएका छन्।

नेपाल सरकारले पहिलो पटक आयोजना गरेको सगरमाथा संवादको उद्घाटन सत्रमा बोल्दै प्रधानमन्त्री ओलीले जलवायु परिवर्तन अहिलेको युगको सबैभन्दा ठूलो चुनौती भएको उल्लेख गरे। “नेपालको भूमिका न्यून भए पनि असरचाहिँ हामीले नै धेरै भोगिरहेका छौँ,” उनले भने।

प्रधानमन्त्री ओलीका अनुसार सगरमाथा संवाद साँचो भावना, ज्ञान साटासाट र सामूहिक प्रयासको माध्यम हो। “यो संवाद सर्वोच्च शिखर सगरमाथाको नाममा, उच्च नैतिकता र साझा दृष्टिकोणका लागि जन्मिएको हो,” उनले स्पष्ट पारे।

उनले जलवायु परिवर्तनका कारण बाढी, पहिरो, खडेरीजस्ता प्राकृतिक विपद्‌ले नेपाली जनताको जनजीवन तहस-नहस बनाइरहेको उल्लेख गरे। “हामी डटेर बसेका छौं, उत्सर्जन न्यून छ तर संरक्षणमा हाम्रो योगदान ठूलो छ,” प्रधानमन्त्री ओलीले भने।

प्रधानमन्त्रीले सगरमाथा संवाद विश्वव्यापी रुपमा जलवायु समस्यामाथि बहस, विचार र समाधान निकाल्ने महत्त्वपूर्ण अवसर हो भन्ने आशा व्यक्त गरे।