पर्सामा बाघको निगरानीका लागि क्यामेरा ट्रयापिङ जडान

पर्सा , ३ फागुन । पर्सा जिल्लाको साझेदारी वनमा बाघको निगरानी गर्न अत्याधुनिक क्यामेरा ट्रयापिङ जडान गरिएको छ। बस्तीमा बाघको गतिविधि बढ्दै गएकोले यसको निगरानीका लागि क्यामेरा ट्रयापिङ सुरु गरिएको हो। पर्साका डिभिजन वन अधिकारी मञ्जुर अहमदका अनुसार, माघ २९ गतेदेखि १२ स्थानमा क्यामेरा ट्रयापिङ जडान गरिएको छ। यसले बाघ र चितुवा जस्ता जङ्गली जनावरहरूको गतिविधि अध्ययन र अनुसन्धानमा सहयोग पुर्याउने अपेक्षा गरिएको छ। राष्ट्रिय निकुञ्जमा क्यामेरा ट्रयापिङ सामान्य भए पनि साझेदारी वनमा यो पहिलोपटक जडान गरिएको हो।

पर्सा जिल्लामा सबैया, बढनिहार र मानवा सवडिभिजन कार्यालयमा तीन–तीन क्यामेरा ट्रयापिङ जडान गरिएको छ। साथै रङ्गपुर र भतौडामा पनि क्यामेरा ट्रयापिङका क्यामेरा जडान भइरहेको छ। क्यामेराले २४ घण्टा बाघ र अन्य जङ्गली जनावरहरूको गतिविधि फोटो खिच्ने क्षमता राख्दछ। यस क्यामेराको दैनिक १६ जीबी क्षमता छ। रङ्गपुर सबडिभिजनका फरेष्टर पुरूषोत्तमप्रसाद पटेलले क्यामेरा ट्रयापिङले जङ्गली जनावरहरूको गतिविधि विश्लेषणमा मद्दत पुर्याउने विश्वास व्यक्त गरेका छन्। यो क्यामेरा डब्लूडब्लुएफको सहयोगमा जडान गरिएको हो।