काठमाडौं । सरकारले आगामी आर्थिक वर्ष २०८२/८३ को बजेट आजैदेखि कार्यान्वयन गर्न सकिने व्यवस्था मिलाएको छ। तयारी पूरा भएका आयोजनाहरूले साउन पर्खनु नपरी आजैबाट नै खरीद प्रक्रिया थाल्न सक्ने अर्थमन्त्री विष्णुप्रसाद पौडेलले बताएका छन्।
शुक्रबार अर्थ मन्त्रालयमा आयोजित बजेटपछिको पत्रकार सम्मेलनमा अर्थमन्त्री पौडेलले बजेट खर्चलाई सहजीकरण गर्ने उद्देश्यसहित नयाँ व्यवस्था गरिएको जानकारी दिए। “तयारी पूरा भएका आयोजनाले आजैदेखि बजेट खर्च सुरु गर्न सक्नेछन्,” उनले भने।
उपप्रधान तथा अर्थमन्त्री पौडेलले आगामी वर्षको बजेट निजी क्षेत्रलाई लगानीमा उत्प्रेरित गर्ने उद्देश्यअनुसार ल्याइएको स्पष्ट पारे। मदिरा, वियर, वाइन जस्ता वस्तुहरूमा मूल्य आधारित कर प्रणाली लागू गरिएको र निजी क्षेत्रलाई सहुलियत दिन विभिन्न प्रोत्साहनसहितको नीति समावेश गरिएको उनको भनाइ थियो।
त्यस्तै, राष्ट्रिय योजना आयोगका उपाध्यक्ष डा. शिवराज अधिकारीले बजेट आजैबाट कार्यान्वयनमा गएको र मन्त्रालयगत समन्वयमार्फत कार्यान्वयनमा सहजता ल्याउने कार्य आयोगले गर्ने जानकारी दिए। “१६ औं योजनासँग लिंक भएर आएको यो बजेट कार्यान्वयन गर्न सकिने वातावरण तयार भएको छ,” उनले भने।
बजेटमार्फत हरित ऊर्जा प्रवर्द्धनमा समेत जोड दिइएको छ। अर्थमन्त्री पौडेलका अनुसार, ग्रिन हाइड्रोजन उत्पादन, इनोभेसन तथा अनुसन्धानमा सहुलियत दिइएको छ। यस्ता आयोजनाका लागि आवश्यक पर्ने मेसिन तथा उपकरण आयातमा महसुल छुट दिइएको छ।
त्यस्तै, काठ उद्योग, खेलकुद पूर्वाधार, विद्युत् चार्जिङ स्टेशनजस्ता क्षेत्रमा लाग्ने कर दर एक प्रतिशतमा झारिएको छ। “नेपालसँग पर्याप्त काठ स्रोत रहेकोले काठजन्य उद्योगहरूलाई प्रोत्साहन गर्न कर छुटको व्यवस्था गरिएको हो,” मन्त्री पौडेलले भने।
सरकारको यो बजेट कार्यान्वयनमुखी तथा लगानीमैत्री भएको विश्लेषकहरूको मूल्याङ्कन रहेको छ। अब चुनौती भनेको योजनाहरू समयमै कार्यान्वयन गर्न सक्ने शासन प्रणाली विकास गर्नु हो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
