दुवै सदनको बैठक बस्दै , निजामती सेवा विधेयक पारित गर्ने कार्यसूची

काठमाडौँ – संघीय संसद्का दुवै सदनको बैठक आज बस्दैछन् । प्रतिनिधिसभाको बैठक दिउँसो १ बजे संघीय संसद् भवन, नयाँ बानेश्वरमा बस्नेछ भने राष्ट्रियसभाको बैठक अपराह्न १२:१५ बजे हुनेछ ।

प्रतिनिधिसभाको बैठकमा आज ‘संघीय निजामती सेवा विधेयक, २०८०’ पारित गर्ने कार्यसूची तय गरिएको छ । मुलुक संघीय संरचनामा गए पनि प्रशासनिक संघीयता कार्यान्वयनमा जटिलता देखिएको भन्दै गुनासो हुँदै आएको छ । यसअघि असार ३ गते प्रतिनिधिसभामा पारित गर्ने भनिएको सो विधेयक अन्तिम समयमा रोकिएको थियो ।

आजको बैठकमा संघीय मामिला तथा सामान्य प्रशासनमन्त्री राजकुमार गुप्ताले ‘राज्य व्यवस्था तथा सुशासन समितिको प्रतिवेदनसहित’ सो विधेयकमाथि छलफलका लागि प्रस्ताव पेश गर्नुहुनेछ । छलफलपछि विधेयक पारित भई राष्ट्रियसभामा पठाइनेछ । राष्ट्रियसभाबाट पारित भएपछि प्रतिनिधिसभामा फिर्ता आउने र सभामुखले प्रमाणित गरी राष्ट्रपतिसमक्ष पेस गरिनेछ । राष्ट्रपतिबाट प्रमाणीकरण भएपछि विधेयक कार्यान्वयनमा आउनेछ ।

यसैबीच, राष्ट्रियसभाको बैठकमा विनियोजन विधेयक, २०८२ अन्तर्गत १४ वटा मन्त्रालयका शीर्षकमाथि समूहीकृत छलफल हुने सम्भावित कार्यसूची रहेको छ ।