पुस महिनाका लागि बैंकहरूले थप घटाए ब्याजदर

काठमाडौं। एक दर्जनभन्दा बढी वाणिज्य बैंकले व्यक्तिगत मुद्दति निक्षेपको ब्याजदर घटाएका छन्। पुस महिनाका लागि बैंकहरूले नयाँ ब्याजदर सार्वजनिक गरेसँगै व्यक्तिगत मुद्दति निक्षेपमा पाइने अधिकतम औसत ब्याजदर ५ प्रतिशतभन्दा तल झरेको हो। बैंकहरूले सोमबार सार्वजनिक गरेको सूचनाअनुसार पुस महिनाका लागि व्यक्तिगत मुद्दति निक्षेपको अधिकतम औसत ब्याजदर ४.८३४ प्रतिशत कायम भएको छ।

यसअघि मङ्सिर महिनामा उक्त औसत ब्याजदर ५.०४०५ प्रतिशत रहेको थियो। यस आधारमा पुसमा ब्याजदर ०.२०६५ प्रतिशतविन्दुले घटेको देखिन्छ। कुल १३ वाणिज्य बैंकले व्यक्तिगत मुद्दति निक्षेपको अधिकतम ब्याजदर घटाएका हुन्। प्राइम कमर्सियल बैंक, ग्लोबल आइएमई बैंक र राष्ट्रिय वाणिज्य बैंकले समान रूपमा ०.५ प्रतिशतविन्दुले ब्याजदर घटाएका छन्। प्रभु बैंक र कृषि विकास बैंकले ०.४ प्रतिशत तथा कुमारी बैंकले ०.३८ प्रतिशतविन्दुले ब्याजदर घटाएका छन्।

सिटिजन्स बैंक, माछापुच्छ्रे बैंक, एनआईसी एसिया बैंक, सिद्धार्थ बैंक, नेपाल इन्भेष्टमेन्ट मेगा बैंक, एनएमबि बैंक र हिमालयन बैंकसहित सात वाणिज्य बैंकले भने मङ्सिर महिनाकै ब्याजदरलाई निरन्तरता दिएका छन्। पुस महिनामा व्यक्तिगत मुद्दति निक्षेपमा ग्लोबल आइएमई बैंक र हिमालयन बैंकले अधिकतम ५.५ प्रतिशतसम्म ब्याज दिनेछन्। सबैभन्दा कम ब्याजदर प्राइम कमर्सियल बैंकले ४.२५ प्रतिशत कायम गरेको छ।

यसैबीच, संस्थागत मुद्दति निक्षेपको अधिकतम औसत ब्याजदर पनि मङ्सिरको तुलनामा पुसमा ०.१३ प्रतिशतविन्दुले घटेको छ। पुस महिनाका लागि पाँच वाणिज्य बैंकले संस्थागत मुद्दति निक्षेपको ब्याजदर घटाउँदा बाँकी १५ बैंकले पुरानै दरलाई निरन्तरता दिएका छन्।