सांसदहरूको तलब वृद्धिको विरोधमा इन्डोनेसियामा संसद भवनमा आगजनी, ३ को मृत्यु

एजेन्सी — इन्डोनेसियाको दक्षिण सुलावेसी प्रान्तको राजधानी मकासारमा स्थानीय संसद भवनमा भीडले आगजनी गर्दा कम्तीमा तीन जनाको मृत्यु भएको छ भने पाँच जना घाइते भएका छन्। आगलागी शुक्रबार राति सुरु भएको थियो, जसपछि टेलिभिजन रिपोर्टहरूले भवन रातभरि जलिरहेको देखाएका थिए।

स्थानीय विपद् व्यवस्थापन अधिकारी फदली तहरका अनुसार, उद्धारकर्ताहरूले शनिबार बिहानसम्ममा तीन जनाको शव फेला पारेका छन्। आगो लागेपछि केहीले भवनबाट हाम फालेका थिए, जसका कारण जलेर र हड्डी भाँचिएर पाँच जना अस्पताल भर्ना भएका छन्।

यसैबीच, इन्डोनेसियाको अन्य शहरहरूमा पनि विरोध प्रदर्शन चर्किएका छन्। पश्चिम जाभाको बान्डुङ शहरमा क्षेत्रीय संसदमा आगजनी गरिए पनि कुनै जनधनको क्षति भएको छैन। सुराबायामा प्रदर्शनकारीहरूले सवारीसाधन जलाए, बारहरू तोडे र प्रहरी मुख्यालयमा आक्रमण गरे।

प्रहरीले अश्रुग्यास र पानीको तोप प्रयोग गरी भिड नियन्त्रणमा ल्याउने प्रयास गरे पनि प्रदर्शनकारीहरूले आतिशबाजी र काठका डन्डी प्रयोग गरेर प्रतिकार गरेका थिए। अमेरिका, अष्ट्रेलिया लगायत अन्य देशहरूले आफ्ना नागरिकहरूलाई प्रदर्शन स्थलबाट टाढा रहन सल्लाह दिएका छन्। पछिल्ला अशान्तिपछि राष्ट्रपति प्रबोवो सुबियान्तोले चीन भ्रमण रद्द गरेका छन्।