बझाङमा भूकम्पमा परी ५ जना घाइते, राजमार्ग अवरुद्ध

बझाङ ,  १६ असोज  | बझाङको चैनपुर केन्द्रविन्दु भएर ६ दशमलव ३ रेक्टर स्केलको भूकम्प गएको छ । आज मङ्गलवार दिउँसो ३ बजेर ६ मिनेटमा भूकम्प गएको राष्ट्रिय भूकम्प मापन केन्द्र सुर्खेतले जनाएको छ ।

भूकम्पले थलारा गाउँपालिका–९ को सिरेटा, फकाली, खानी, अफ्ला, चित्रु, मालुमेला, चैनपुर, छविसपाथिभेरा लगायतका ठाउँमा दर्जनभन्दा बढी घर भत्किएको छ ।
भूकम्प पछि स्थानीयहरु कोलाहल गर्दै सडक, खुला चौरमा आएर बसेका छन्

यसअघि दिउँसो २ बजेर ४० मिनेटमा बझाङको तल्कोट केन्द्रविन्दु भएर ५ दशमलव ७ रेक्टर स्केलको भूकम्प गएको थियो ।

उक्त भूकम्पमा परी अहिलेसम्म बझाङमा ५ जना र बैतडीमा १ जना घाइते भएको जानकारी पाएको  सुदूरपश्चिम प्रदेश प्रहरी कार्यालयले जनाएको छ । भूकम्पसँगै आएको सुक्खा पहिरो जादा जयपृथ्वी राजमार्ग अवरुद्ध भएको छ । प्रहरीका अनुसार सडक माथिबाट पहिरो जादा जयपृथ्वी नगरपालिका–७ को कचरी खोलामा राजमार्ग अवरुद्ध भएको छ ।