मतगणनामा नयाँ राजनीतिक संकेत: रास्वपाको अग्रता, बालेन झापा–५ मा अगाडि

काठमाडौं। देशभर जारी मतगणनाको पछिल्लो विवरणले विभिन्न राजनीतिक दलबीचको प्रतिस्पर्धा क्रमशः स्पष्ट हुँदै गएको देखाएको छ। प्रारम्भिक नतिजाअनुसार राष्ट्रिय स्वतन्त्र पार्टीले उल्लेख्य अग्रता कायम गरेको छ। हालसम्म प्राप्त विवरणअनुसार उक्त दलका ६० उम्मेदवार विभिन्न निर्वाचन क्षेत्रमा अगाडि रहेका छन् भने एक स्थानमा जित सुनिश्चित गर्दै कुल ५९ सिटको अवस्था देखिएको छ।

त्यसैगरी नेकपा एमालेले पनि केही क्षेत्रमा अग्रता कायम गर्दै प्रतिस्पर्धालाई निरन्तरता दिएको छ। नेपाली कांग्रेसका उम्मेदवार पाँच क्षेत्रमा अगाडि देखिएका छन् भने नेकपा समूहका उम्मेदवार तीन क्षेत्रमा अग्रस्थानमा रहेको प्रारम्भिक तथ्याङ्कले देखाएको छ।

यसैबीच राष्ट्रिय प्रजातन्त्र पार्टीले एक स्थानमा अग्रता कायम गरेको छ भने श्रम संस्कृति समूहले पनि एक क्षेत्रमा जित हासिल गरेको जानकारी सार्वजनिक भएको छ।

मतगणना प्रक्रिया अझै जारी रहेकाले आगामी घण्टाहरूमा परिणाम थप स्पष्ट हुँदै जाने अपेक्षा गरिएको छ। प्रारम्भिक नतिजाले दलहरूबीच नयाँ राजनीतिक समीकरणको संकेत समेत देखाउन थालेको विश्लेषण भइरहेको छ।

झापा निर्वाचन क्षेत्र नम्बर ५ मा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ले भारी अग्रता लिएका छन् । उनले नेकपा एमालेका अध्यक्ष केपी शर्मा ओलीलाई निकै पछाडि पारेका छन्।

पछिल्लो प्राप्त मतपरिणाम अनुसार रास्वपाका बालेन्द्र शाह (बालेन) ले १० हजार १९० मत प्राप्त गरेका छन् । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले ४ हजार ८७ मत पाएका छन्। बालेन र ओलीबीचको मतान्तर ६ हजार १०३ रहेको छ ।

अन्य उम्मेदवारहरू प्रतिस्पर्धामा निकै पछाडि देखिएका छन् । श्रम संस्कृति पार्टीका समिर तामाङले १३९ मत प्राप्त गरेका छन् भने नेपाली कम्युनिस्ट पार्टीका रन्जित तामाङ ९० मतका साथ चौथो स्थानमा छन् ।

काठमाडौं १ मा प्रत्यक्षतर्फको मतगणना सकियो, अब समानुपातिक तर्फको मतगणना हुने भएको छ।