विश्व सहरीकरण दिवस : ‘जनकेन्द्रित स्मार्ट सहर’ नारासहित विश्वभर मनाइँदै

काठमाडौं । आज (अक्टोबर ३१) का दिन विश्वका विभिन्न मुलुकमा ‘विश्व सहरीकरण दिवस’ मनाइँदै छ। सहरहरूको दिगो विकास, मानवकेन्द्रित योजनाबद्धता र सहकार्यको सन्देश प्रवाह गर्न सन् २०१४ देखि यो दिवस मनाउन थालिएको हो।

यस वर्ष ‘जनकेन्द्रित स्मार्ट सहर’ भन्ने नाराका साथ विश्वभर विभिन्न सहरहरूमा विशेष कार्यक्रम आयोजना हुँदैछ। सहरमा बसोबास, पूर्वाधार, आवास, वातावरण र समावेशी विकासका विषयमा छलफल तथा प्रदर्शनहरू आयोजना गरेर दिगो सहरी विकासका उपायहरू खोज्ने प्रयास भइरहेका छन्।

संयुक्त राष्ट्रसङ्घको आह्वानमा आज कोलम्बियाको राजधानी बोगोटामा पनि विशेष कार्यक्रम हुँदैछ। उक्त कार्यक्रममा विश्वका विभिन्न देशका प्रतिनिधिहरू सहभागी हुँदै आवास संकट, सहरी व्यवस्थापन, र दिगो विकासका रणनीतिबारे अनुभव साटासाट गर्नेछन्।

विश्व सहरीकरण दिवस मनाउने मुख्य उद्देश्य सहरमा बढ्दो जनसंख्या र आवास संकटजस्ता विश्वव्यापी चुनौतीहरूको समाधानका लागि दिगो, समावेशी र सुरक्षित सहर निर्माणमा सहकार्य प्रवद्र्धन गर्नु हो। यसमार्फत सहरलाई वातावरणमैत्री, प्राविधिक रूपमा सुदृढ र नागरिकमैत्री बनाउन जोड दिइन्छ।

सन् २०१४ मा चीनमा ‘प्रमुख सहरी रूपान्तरण’ भन्ने नाराका साथ पहिलोपटक यो दिवस मनाइएको थियो। त्यसयता, प्रत्येक वर्ष संयुक्त राष्ट्रअन्तर्गतका निकायहरूले सहरी योजना, आवास, र वातावरणीय सन्तुलनका पक्षमा सचेतना जगाउँदै यो दिवसलाई विश्वव्यापी अभियानको रूपमा अघि बढाइरहेका छन्।