काठमाडौं, माघ २२ – नेपाल टेलिकमले आफ्नो स्थापनाको २१औं वार्षिकोत्सव विविध कार्यक्रमसहित सम्पन्न गरेको छ। केन्द्रीय कार्यालयसहित विभिन्न प्रादेशिक निर्देशनालय तथा दूरसञ्चार कार्यालयहरूमा विशेष समारोहको आयोजना गरिएको थियो।
केन्द्रीय कार्यालयमा आयोजित मुख्य समारोहमा सञ्चार तथा सूचना प्रविधि मन्त्रालयका सचिव तथा नेपाल टेलिकम सञ्चालक समितिका अध्यक्ष राधिका अर्यालको अध्यक्षतामा कार्यक्रम सम्पन्न भएको थियो। उक्त अवसरमा सञ्चार तथा सूचना प्रविधि मन्त्री पृथ्बीसुब्बा गुरुङ प्रमुख अतिथि रहनुभएको थियो।
कार्यक्रमलाई सम्बोधन गर्दै मन्त्री गुरुङले नेपाल टेलिकम सरकारको स्वामित्वमा रहेका संस्थानहरूमध्ये सबैभन्दा गौरवशाली इतिहास बोकेको उल्लेख गर्नुभएको छ। उहाँले दूरसञ्चार क्षेत्रमा बढ्दो प्रतिस्पर्धाका कारण नेपाल टेलिकमको कार्यदक्षतामा देखिएको प्रभावको समीक्षा गर्दै आवश्यक सुधारका उपायहरू अपनाउन आग्रह गर्नुभएको छ। साथै, सेवाको आधुनिकीकरण, विस्तार र परिमार्जन गर्दै देशभर 4G सेवाको पहुँच विस्तार गर्नुपर्नेमा जोड दिँदै सरकारको नीति परिमार्जन गरी टेलिकमलाई व्यवस्थित रूपमा सञ्चालन गर्न आवश्यक सहयोग प्रदान गरिने बताउनुभएको छ।
सञ्चार तथा सूचना प्रविधि मन्त्रालयका सचिव तथा नेपाल टेलिकम सञ्चालक समितिका अध्यक्ष राधिका अर्यालले टेलिकमले विकट तथा दुर्गम भेगसम्म सेवा विस्तार गर्दै आएकोमा प्रशंसा गर्दै बजार प्रतिस्पर्धामा टिक्न सेवा विविधीकरण, बजार रणनीति सुदृढीकरण तथा उपभोक्ता गुनासा शीघ्र सम्बोधन गर्नुपर्ने धारणा व्यक्त गर्नुभएको छ। उहाँले डिजिटल विभाजन न्यूनीकरण गर्दै मुलुकलाई डिजिटलाइजेसनतर्फ अघि बढाउन टेलिकमले महत्वपूर्ण भूमिका खेल्ने विश्वास व्यक्त गर्नुभएको छ।
नेपाल दूरसञ्चार प्राधिकरणका अध्यक्ष भुपेन्द्र भण्डारीले नेपाल टेलिकम हालसम्म अग्रणी सेवा प्रदायकको रूपमा रहेको उल्लेख गर्दै भविष्यमा समेत सो स्थान कायम राख्न कम्पनीले समयसापेक्ष सुधार गर्नुपर्ने आवश्यकता औंल्याउनुभएको छ। उहाँले ग्राहक अनुभव सुधारका लागि विस्तृत अनुसन्धान आवश्यक रहेकोमा जोड दिनुभएको छ।
नेपाल टेलिकमका प्रबन्ध निर्देशक संगीता पहाडी (अर्याल) ले कम्पनीको हालको अवस्था तथा आगामी योजनाबारे जानकारी गराउँदै मुलुकभर 4G LTE तथा अप्टिकल फाइबरमा आधारित FTTH सेवा सञ्चालनमा आइसकेपछि ग्राहक संख्या उल्लेखनीय रूपमा वृद्धि भएको जानकारी दिनुभएको छ। हाल कुल मोबाइल डाटा खपतको ९० प्रतिशतभन्दा बढी हिस्सा 4G सेवाले ओगटेको बताउँदै ग्रामीण दूरसञ्चार विकास कोषमार्फत जडान भएका अप्टिकल फाइबर नेटवर्कको सह-प्रयोग थालनी गरिएको, हाइवे नेटवर्क सुधार कार्य निरन्तर जारी रहेको र चाँडै नै 5G सेवा भित्र्याउने लक्ष्य रहेको जानकारी गराइएको छ।
वार्षिकोत्सवकै अवसर पारेर VoWiFi सेवा व्यावसायिक रूपमा सञ्चालनमा ल्याइएको तथा टेलिकम एप तथा वेबसाइटमार्फत eSIM सहजै प्राप्त गर्न सकिने व्यवस्था मिलाइएको जानकारी दिइएको छ। यसबाट उपभोक्ताहरूलाई थप सुविधा प्रदान हुने अपेक्षा गरिएको छ।
नेपाल टेलिकमले संस्थागत सामाजिक उत्तरदायित्वअन्तर्गत शिक्षा, स्वास्थ्य, सामाजिक विकास, वातावरण संरक्षण, प्रकोप व्यवस्थापन, गरिबी निवारण, उद्यमशीलता तथा खेलकुदका क्षेत्रमा विभिन्न कार्यक्रम सञ्चालन गर्दै आएको छ। यसै क्रममा, आगामी SEE परीक्षामा सहभागी हुने विकट क्षेत्रका सरकारी तथा सामुदायिक विद्यालयका दुई लाख विद्यार्थीलाई अनलाइन माध्यमबाट निःशुल्क शिक्षा सेवा उपलब्ध गराउने, तीन अन्तर्राष्ट्रिय तथा ३१ आन्तरिक विमानस्थलमा निःशुल्क Wi-Fi सेवा प्रदान गर्ने तथा विभिन्न सामुदायिक पुस्तकालयहरूमा इ-लाइब्रेरी सेवा उपलब्ध गराउने योजनाबारे जानकारी दिइएको छ। साथै, दृष्टिविहीन तथा वृद्ध नागरिकलाई कम्प्युटर, सेतो छडी तथा थर्मसजस्ता उपयोगी सामग्री प्रदान गरिने, प्राकृतिक प्रकोप प्रभावित क्षेत्रलाई सहयोग गरिने तथा धार्मिक तथा सांस्कृतिक महत्वका स्थानहरूको संरक्षणमा योगदान दिइने जानकारी गराइएको छ।
नेपाल टेलिकमले वार्षिकोत्सवका अवसरमा विभिन्न आकर्षक ‘Anniversary Package’ हरू सार्वजनिक गरेको छ, जुन 1415*11# डायल गरेर, टेलिकम एप वा वेबसाइटमार्फत खरिद गर्न सकिनेछ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
