काठमाडौँ । नेकपा एमालेले आज काठमाडौँमा शान्तिपूर्ण जनप्रदर्शन तथा जनसभा आयोजना गर्दैछ। एमाले बागमती प्रदेश कमिटीको आयोजनामा प्रदर्शनीमार्ग केन्द्रित कार्यक्रममार्फत पार्टीले प्रतिनिधिसभा निर्वाचन लक्षित विशेष अभियानको औपचारिक थालनी गर्न लागेको हो।
एमालेले उक्त कार्यक्रमलाई शक्ति प्रदर्शनको रूपमा लिएको छ। पार्टीका नेताहरूका अनुसार संसद् विघटनपछि बनेको सुशीला कार्की नेतृत्वको सरकार असंवैधानिक रहेको दाबी गर्दै त्यसको विरोध स्वरूप जनप्रदर्शन र जनसभा आयोजना गरिएको हो। भृकुटीमण्डपबाट सुरु हुने जनप्रदर्शन कमलादीसम्म पुगेर जनसभामा परिणत हुने कार्यक्रम तय गरिएको छ।
एमाले नेता महेश बस्नेतले आजको कार्यक्रममा करिब ६० हजार जनसहभागिता रहने दाबी गरेका छन्। पार्टीले यसअघि ‘नेसनल भोलेन्टियर फोर्स’ घोषणा गरिसकेको उल्लेख गर्दै उनले जनसभा पार्टीको संगठनात्मक शक्ति र जनसमर्थन प्रदर्शन गर्ने अवसर हुने बताएका छन्।
मध्यान्ह १२ बजे सुरु हुने जनसभालाई एमाले अध्यक्ष केपी शर्मा ओलीले सम्बोधन गर्ने कार्यक्रम रहेको छ। पार्टीले देशभरका नेता–कार्यकर्ता, समर्थक तथा सर्वसाधारणलाई कार्यक्रममा सक्रिय सहभागिताका लागि आह्वान गरेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
