अमेरिकामा कार दुर्घटना हुँदा दुई नेपाली विद्यार्थीको मृत्यु

एजेन्सी । अमेरिकाको लुइजियाना राज्यमा भएको कार दुर्घटनामा दुई नेपाली विद्यार्थीको मृत्यु भएको छ। लुइजियाना टेक विश्वविद्यालयमा अध्ययनरत २२ वर्षीय राजन यादव र २० वर्षीय रोजिन ओलीको असार २९ गते राति ९ बजे दुर्घटनामा ज्यान गएको हो।

प्रहरीका अनुसार, यादवले चलाएको कार भारी वर्षाका कारण चिप्लिएर रूखमा ठोक्किएको थियो, जसपछिको आगलागीमा यादव र ओलीको घटनास्थलमै मृत्यु भयो। कारमा रहेका अन्य दुई व्यक्ति घाइते भई स्थानीय अस्पतालमा उपचाररत छन्।

दुर्घटनामा परेका यादव र ओली नेपालका नागरिक हुन् भने पनि उनीहरूको ठेगाना सार्वजनिक गरिएको छैन। लुइजियाना टेक विश्वविद्यालयले घटनापछि श्रद्धाञ्जली वक्तव्य जारी गर्दै शोक व्यक्त गरेको छ, तर मृतकको विस्तृत विवरण उल्लेख गरिएको छैन। प्रहरीले घटनाबारे थप अनुसन्धान भइरहेको जनाएको छ।