हृदयाघात भएकी ७० वर्षीया महिलाको नर्भिक अस्पतालमा हेलिकोप्टर उद्धारपछि सफल उपचार

काठमाडौं —जनकपुरकी ७० वर्षीया एक महिला हृदयाघात भएपछि नर्भिक अस्पतालको मेडिकल टोलीले हेलिकोप्टरमार्फत् तत्काल उद्धार गरी सफल उपचार गरेको छ। छाती दुख्ने र चक्कर आउने समस्या देखिएपछि महिलालाई जनकपुरस्थित जानकी हेल्थकेयरको आईसीयूमा भर्ना गरिएको थियो।

उद्धार तथा उडानमै उपचार

नर्भिक अस्पतालको इमर्जेन्सी विभाग प्रमुख डा. रीजु वैद्यको नेतृत्वमा प्यारामेडिक्स अरविन्दकुमार शाह र दिनेश राईसहितको टोली आइतबार साँझ जनकपुर पुगेको थियो। टोली पुग्दा बिरामीको हृदयमा कम्प्लिट हार्ट ब्लक देखिएको र मुटुको चाल २५ भन्दा कम रहेको पुष्टि भयो।

जनकपुरमै प्रारम्भिक उपचार गरेपछि बिरामीलाई काठमाडौं ल्याउने क्रममा हवाई उडानमै हृदय पुनः रोकिएपछि सीपीआर र आकस्मिक उपचार दिइएको थियो।

काठमाडौंमा तयारी अवस्थामा उपचार टोली

बिरामी काठमाडौं पुग्दा नर्भिकको इमर्जेन्सी तथा कार्डियोलोजी विभागको टोली पूर्वतयारी अवस्थामा थियो। डा. नमिता अधिकारी र डा. रोशन शर्माको टोलीले ती महिलालाई इन्ट्युबेसन गरेर भेन्टिलेटरमा राख्यो। त्यसपछि प्रा. डा. यादव भट्टको नेतृत्वमा अस्थायी पेसमेकर राखिएको थियो।

बिरामीलाई त्यसपछि सीसीयूमा राखेर डा. प्रदीप तिवारी र डा. रोमन कार्कीको टोलीले उपचार जारी राख्यो।

एक दिनमै सुधार

अस्पतालका अनुसार, सोमबार नै बिरामीलाई भेन्टिलेटरबाट हटाइयो र पेसमेकर पनि फालिएको छ। अहिले बिरामीको अवस्था सुधारोन्मुख रहेको छ।