आजको मौसम:कोशी–बागमतीमा भारी वर्षाको सम्भावना

काठमाडौँ, असार ६ । हाल देशका विभिन्न भू–भागमा मनसुनी वायुको प्रभाव देखिएको छ। विशेषगरी कोशी, मधेश, बागमती, गण्डकी प्रदेशका केही स्थानहरू र लुम्बिनी प्रदेशको पूर्वी क्षेत्रमा मनसुनी प्रभाव सक्रिय रहेको मौसम पूर्वानुमान महाशाखाले जनाएको छ। साथै, देशको पश्चिमी भागमा पश्चिमी वायु तथा स्थानीय वायुले पनि आंशिक प्रभाव पारिरहेको छ। भारतको पश्चिम बङ्गाल आसपास बनेको न्यूनचापीय क्षेत्रको आंशिक प्रभावसमेत नेपालमा परेको बताइएको छ।

शुक्रबार दिउँसो देशभर आंशिकदेखि सामान्य बदली रहनेछ। देशका पहाडी भू–भागका केही स्थानहरूमा र बाँकी क्षेत्रका थोरै स्थानहरूमा मेघगर्जन तथा चट्याङसहित हल्कादेखि मध्यम वर्षाको सम्भावना छ।

कोशी, बागमती, गण्डकी र लुम्बिनी प्रदेशका एक–दुई स्थानमा भने भारी वर्षाको सम्भावना पनि रहेको छ। उच्च पहाडी तथा हिमाली भू–भागका थोरै स्थानमा हल्का वर्षा वा हिमपात हुन सक्ने सम्भावना महाशाखाले जनाएको छ।

त्यस्तै, कोशी र मधेश प्रदेशका तराई क्षेत्रमा पनि केही स्थानहरूमा हावाहुरीको सम्भावना छ। मौसम विभागले ती क्षेत्रका बासिन्दालाई आवश्यक सतर्कता अपनाउन आग्रह गरेको छ।