वीरगञ्ज भन्सार कार्यालयको राजस्व सङ्कलन लक्ष्य घटाइयो

वीरगञ्ज, ५ भदौ — वीरगञ्ज भन्सार कार्यालयले दुई वर्षदेखि लक्ष्यअनुसारको राजस्व सङ्कलन गर्न असफल भएसँगै भन्सार विभागले यस कार्यालयको लक्ष्य घटाइदिएको छ। आर्थिक वर्ष २०८०/८१ को तुलनामा चालु आर्थिक वर्ष २०८१/८२ मा भन्सार विभागले राजस्व सङ्कलनको लक्ष्य रु २६ अर्ब ९२ करोड ८६ लाख ७२ हजारले घटाएको हो।

विभागले वीरगञ्ज भन्सार कार्यालयलाई आव २०८०/८१ मा रु दुई खर्ब ४५ अर्ब ८८ करोड ५० लाख ८२ हजारको लक्ष्य निर्धारण गरेको थियो। तर, कार्यालयले सो वर्षमा मात्र रु एक खर्ब ५७ अर्ब ४० करोड ३१ लाख २८ हजारको राजस्व सङ्कलन गर्न सकेको थियो। यसपछि विगतका वर्षको तुलना गर्दा लक्ष्य र सङ्कलनबीचको ठूलो अन्तरका कारण चालु आवको लक्ष्य घटाइएको बताइएको छ।

नेपाल उद्योग वाणिज्य महासङ्घका केन्द्रीय सदस्य सुबोधकुमार गुप्ताले भन्सार विभागले समयसापेक्ष भन्दा बढी महत्वाकाङ्क्षी लक्ष्य निर्धारण गर्ने परिपाटीको आलोचना गरे। उनले भने, “सरकारले आयात घटिरहेको अवस्थामा महत्वाकाङ्क्षी लक्ष्य राख्दा लक्ष्य प्राप्त गर्न सकिँदैन। गत आवको सङ्कलनको १० देखि १५ प्रतिशत बढाएर लक्ष्य राख्दा सहजै प्राप्त गर्न सकिन्थ्यो।”

वीरगञ्ज भन्सार कार्यालयका सूचना अधिकारी रघुलाल कर्णले भने, “विगत केही वर्षदेखि लक्ष्यअनुसारको राजस्व सङ्कलन हुन नसकेको छ। विभागले यो वर्ष रु दुई खर्ब १८ अर्बको लक्ष्य निर्धारण गरेको छ, र कार्यालय यसमा सक्रिय रहनेछ।”

आव २०७८/७९ मा भने कार्यालयले रु दुई खर्ब ३ अर्बको लक्ष्य राखेर १०० दशमलव ५४ प्रतिशत अर्थात् रु दुई खर्ब ४ अर्ब १२ करोड राजस्व सङ्कलन गरेको थियो।