कमलादीकाे स्काइ वाककाे गुणस्तरलगायतका विषयमा छानविन गर्दै महानगर

काठमाडौं,१५ साउन । काठमाडाै‌ंकाे कमलादीमा हालै मात्र सञ्चालनमा आएकाे स्काइ वाककाे शुल्क महँगाे भएकाे र अन्य शुल्कहरुमा समेत ठगिएकाे गुनासाे बढ्न थालेपछि काठमाडाै‌ं महानगर पालिकाले छानविन गर्ने भएकाे छ ।
महानगरले  स्काइवाककाे पार्किङ, प्रवेश शुल्क, डिजाइन र गुणस्तरसम्म अध्ययन गर्ने जनाएकाे छ । महानगर पालिकाका प्रवक्ता नविन मानन्धरले संरचना निर्माणमा महानगरपालिकामा पूरा गर्नुपर्ने सम्पूर्ण प्रक्रिया पूरा गरे नगरेको विषयमा समेत अध्ययन भइरहेको जानकारी दिए ।

७८.५ मिटर अग्लो स्काई वाक टावर निर्माण तथा सञ्चालनमा कानूनी प्रक्रिया पूरा भए नभएको, पार्किङलगायतको अन्य व्यवस्था साथै टावर अवलोकनमा गएकासँग लिइएको शुल्कसमेत सम्पूर्ण विषयमा अध्ययन सुरू भएको उनले स्पष्ट पारे ।

संरचना निर्माणमा महानगरपालिकामा पूरा गर्नुपर्ने सम्पूर्ण प्रक्रिया पूरा गरे नगरेको विषयमा समेत अध्ययन थालिएकाे छ  ।महानगरले टावरको विषयमा कम्पनीसँग सबै विवरण माग्ने तयारी गरेको छ।

स्काई वाक टावर वन्डर्स ग्रुप प्रालिले सञ्चालनमा ल्याएको हो। दक्षिण एसियाकै अग्लो टावरमा प्रयोग भएका सामान तथा उपकरणको गुणस्तरकाे भए नभएकाे समेत छानविन गर्ने प्रवक्ता मानन्धरले बताए ।

टावरको निर्माण २०७६ मंसिरमा सुरु भएको थियो। तर कोरोनाका कारण निर्माण ढिला भएको थियो। २२ औँ तल्लामा रहेको स्काई वाकमा २० मिनेट बस्न सर्वसाधरणले एक हजार रुपैयाँ शुल्क तिर्नुपर्ने हुन्छ। कम्पनीले ८० वर्षमाथिका जेष्ठ नागरिक र ३ फिटसम्म उचाइ भएकालाई नि:शुल्क, ७० देखि ८० वर्षसम्मलाई ५ सय रुपैयाँमा टिकट उपलब्ध गराउँदै आएको छ। स्काई वाकबाट ३६० डिग्रीमा काठमाडौं उपत्यकाको दृष्य अवलोकन गर्न पाइने बताइएको छ।

परियोजना १३ रोपनी २ आना जग्गामा फैलिएको छ। ७८.५ मिटर अग्लो टावरमा जमिनको सतहबाट ६५ मिटर उचाइमा सिसामा स्काई वाक गराइएको छ। परियोजनाका लागि करिब २ अर्ब रूपैयाँ लगानी लागेको कम्पनीको दाबी छ।

कम्पनीको  अध्यक्ष आकर्षण पोखरेल हुन् भने  तेजबहादुर सिंह, खेमराज न्यौपाने, पदम न्यौपाने, आशुतोष विक्रम सिंह र सोहन श्रेष्ठ सदस्य रहेका छन्। यसबाहेक अन्य करिब ५ दर्जन व्यक्तिको लगानी रहेको बुझिएको छ।