सदन अवरोध हटाउन प्रधानमन्त्री , सभामुख र शीर्ष नेताहरुको बैठक जारी

काठमाडौँ, चैत २७ । नेपाली काँग्रेसको संसदीय दलको बैठकले उपप्रधान तथा गृहमन्त्री रवि लामिछाने माथि लागेको आरोपमा संसदीय छानबिन समिति बनाएरै छानबिन गर्नुपर्ने निर्णयबाट पछि नहटने बताएको छ । सहकारीको रकम अपचलनमा मुछिएका गृहमन्त्री रवि लामिछाने उपर संसदीय छानबिन समिति गठन हुनुपर्ने सर्वसम्मत निर्णय गरेको छ ।

आजको बैठक प्रतिपक्षी नेपाली काँग्रेसले अवरुद्ध गर्ने चेतावनी दिएको छ। कांग्रेसको माग छलफल गर्न सभामुख घिमिरेले कांग्रेस, नेकपा एमाले, नेकपा माओवादी केन्द्र र राष्ट्रिय स्वतन्त्र पार्टीका शीर्ष नेतासँग छलफल गरेका थिए ।

सदन अवरोध खुलाउने विषयमा प्रधानमन्त्री निवास बालुवाटारमा प्रधानमन्त्री पुष्पकमल दाहाल, सभामुख देवराज घिमिरे, एमाले अध्यक्ष केपी शर्मा ओली, काँग्रेस नेता कृष्णप्रसाद सिटौला, महामन्त्री गगन थापासहितको बैठक सुरु भएको छ । हिजो प्रधानमन्त्री पुष्पकमल दाहाल सहित बसेको बैठकमा प्रमुख प्रतिपक्ष दल नेपाली कांग्रेस आफ्नो अडानबाट पछि नहटेपछि बैठक बिना निष्कर्ष टुंगिएको थियो ।