राष्ट्रपतिविरुद्ध मुद्दाको पेशी न्यायाधीश हरिप्रसाद फुयालको इजलासमा

काठमाडौँ, ९ असोज । नागरिकता विधेयक प्रमाणीकरण नगर्ने राष्ट्रपति विद्यादेवी भण्डारीको निर्णयविरुद्ध परेका रिटको सुनुवाइ आज आइतबार हुने भएको छ।

मुद्दाको पेशी न्यायाधीश हरिप्रसाद फुयालको एकल इजलासमा तोकिएको छ।

यसअघि शुक्रबार मुद्दाको पेशी तोकिए पनि हेर्न नभ्याइनेमा राखिएको थियो। सो दिन मुद्दाको पेशी न्यायाधीश डा. मनोज शर्माको इजलासमा परेको थियो ।
अधिवक्ताहरू सागर बराल, सुनिल रञ्जन सिंह, सुनिल कुमार यादव, देव शर्मा र सोनु रौनियारले छुट्टाछुट्टै रिट दायर गरेका हुन्। रिटमा राष्ट्रपति कार्यालयलाई विपक्षी बनाइएको छ।

संघीय संसदका दुवै सदनबाट पारित भएको नागरिकता विधयक राष्ट्रपतिले प्रमाणीकरण नगरेपछि त्यसविरुद्ध सर्वोच्चमा मुद्दा दायर भएका हुन्।

राष्ट्रपति विद्यादेवी भण्डारी र राष्ट्रपतिको कार्यालयले संविधानको घोर उल्लंघन गरेको भन्दै नागरिकता विधेयक प्रमाणीकरण नगर्ने निर्णय भएको सो निर्णय उत्प्रेषणको आदेशबाट बदर गर्न र नगरेको भए प्रमाणीकरण गर्नका लागि परमादेश दिन माग गर्दै रिट दर्ता भएको थियो ।