डिजिटल नेपाल अभियानले अर्थतन्त्रमा पाँच प्रतिशत योगदान गर्ने लक्ष्य

काठमाडौँ । सञ्चार तथा सूचना प्रविधिमन्त्री पृथ्वीसुब्बा गुरुङले सूचना प्रविधि (आइटी) क्षेत्रलाई सशक्त बनाएर मुलुकको अर्थतन्त्र प्रवर्द्धन गरिने बताएका छन्।

नेपाल चेम्बर अफ कमर्सले भृकुटीमण्डपमा आयोजना गरेको ‘८औँ नेपाल चेम्बर एक्स्पो २०२५’ मा सम्बोधन गर्दै मन्त्री गुरुङले आइटी क्षेत्रको विकासका लागि पूर्वाधार निर्माण र नीतिगत सुधारलाई सरकार प्राथमिकतामा राखेर अघि बढिरहेको जानकारी दिए।

नेपाल सरकारका प्रवक्तासमेत रहेका मन्त्री गुरुङले विगतको तुलनामा अर्थतन्त्रमा सुधार आएको दाबी गर्दै नीति तथा पूर्वाधार निर्माणमा सरकार क्रियाशील रहेको बताए। “हामी नीतिगत सुधार र पूर्वाधार निर्माण दुवैमा सक्रिय छौँ,” उनले भने।

उनका अनुसार यसै वर्षभित्र नेशनल पार्क, आइटी पार्कलगायत सूचना प्रविधि पूर्वाधार निर्माण गरिनेछ। साथै, सरकारले ल्याएको अध्यादेशले व्यवसायीलाई उत्साहित बनाएको र अर्थतन्त्रमा सकारात्मक प्रभाव पार्ने उनको दाबी छ।

मन्त्री गुरुङले मन्त्रालयमा एआई (कृत्रिम बुद्धिमत्ता) नीति मस्यौदा छलफलको क्रममा रहेको जानकारी दिँदै डिजिटल नेपाल अभियानअन्तर्गत अर्थतन्त्रमा पाँच प्रतिशत योगदान गर्ने सरकारको दीर्घकालीन लक्ष्य रहेको बताए। साथै, उनले आइटी क्षेत्रबाट रोजगारी सिर्जना गर्न आवश्यक पूर्वाधार विकासमा सरकार सक्रिय रहेको उल्लेख गरे।