तीन वर्षसम्म आय–व्यय नबुझाउने सात दललाई आयोगले सोध्यो स्पष्टीकरण

काठमाडौँ — निर्वाचन आयोगले तीन वर्षसम्म आय–व्यय विवरण नबुझाउने सातवटा राजनीतिक दललाई स्पष्टीकरण सोधेको छ। आयोगका प्रवक्ता नारायणप्रसाद भट्टराईका अनुसार पाँच दलले तीन वर्षसम्म लेखापरीक्षण प्रतिवेदन बुझाएको छैन भने दुई दलले लगातार चार वर्षसम्म पेश गरेका छैनन्।

स्पष्टीकरण सोधिएका दलहरूमा आम आदमी पार्टी नेपाल, नेपाल कम्युनिस्ट पार्टी (लोकतान्त्रिक), माओवादी जनमुक्ति पार्टी नेपाल, नेपाल राष्ट्रवादी पार्टी, नेपाल कम्युनिस्ट पार्टी (गौरवशाली), शिव सेना नेपाल र नेपाल समाजवादी पार्टी रहेका छन्। आयोगले तीन दिनभित्र तीन दललाई स्पष्टीकरण पेश गर्न भनेको छ।

राजनीतिक दलसम्बन्धी ऐनअनुसार प्रत्येक दलले आफ्नो आय–व्ययको लेखा राख्न, विद्युतीय अभिलेख तयार पार्न र इजाजतप्राप्त लेखापरीक्षकबाट लेखापरीक्षण गराएर आयोगमा पेश गर्नुपर्नेछ। समयमै पेश नगरेको दलले कारण लेखेर स्पष्टीकरण दिनुपर्ने व्यवस्था गरिएको छ।