ग्लोबल आइएमई बैंक लिमिटेडको १८औं वार्षिक साधारणसभा सम्पन्न

काठमाडौँ। ग्लोबल आइएमई बैंक लिमिटेडको १८औं वार्षिक साधारणसभा बिहीबार काठमाडौँमा सम्पन्न भएको छ। सभामा बैंकले आर्थिक वर्ष २०८०/८१ को सञ्चित मुनाफा र पुँजी समायोजन कोषबाट आफ्ना शेयरधनीहरूलाई ५.५ प्रतिशत बोनस शेयर लाभांश वितरण गर्ने प्रस्तावलाई सर्वसम्मतिमा पारित गरेको जानकारी प्राप्त भएको छ।

साधारणसभामा बैंकका अध्यक्ष चन्द्रप्रसाद ढकालले वार्षिक प्रतिवेदन प्रस्तुत गर्दै एकीकृत वित्तीय विवरण अनुमोदन गराइएको थियो। बोनस शेयर वितरण पश्चात् बैंकको पूँजी वृद्धिको हदसम्म प्रबन्धपत्र र नियमावली संशोधनको प्रस्ताव पनि सभाले पारित गरेको छ।

बैंकले आर्थिक वर्ष २०८०/८१ मा १२ अर्ब ४८ करोड रुपैयाँ सञ्चालन मुनाफा र ६ अर्ब १३ करोड रुपैयाँ करपछिको मुनाफा आर्जन गरेको थियो। प्रस्तावित बोनस शेयर वितरणपछि बैंकको चुक्ता पूँजी ३८ अर्ब ११ करोड ५८ लाख रुपैयाँ पुग्नेछ।

अध्यक्ष ढकालले सो अवसरमा बैंकले नेपाल सरकार र नेपाल राष्ट्र बैंकद्वारा घोषित नीतिहरूको पूर्ण परिपालना गर्दै शेयरधनीहरूलाई उचित लाभांश प्रदान गर्न प्रतिबद्ध रहेको बताउनुभयो। उहाँले बैंकको व्यावसायिक रणनीतिक योजनाअन्तर्गत नयाँ व्यवसायिक क्षेत्रहरूको सन्तुलित विस्तार गर्ने योजना रहेको उल्लेख गर्नुभयो।

साधारणसभामा यसबाहेक बैंकको अन्तर्राष्ट्रिय सफलता पनि विशेष चर्चा विषय बनेको थियो। ग्लोबल आइएमई बैंकले “ग्लोबल फाइनान्स”को “बेष्ट बैंक अवार्ड २०२४” र “युरो मनी अवार्ड फर एक्सलेन्स २०२४” अन्तर्गत दुई विधामा नेपालको सर्वश्रेष्ठ बैंकको रूपमा सम्मान प्राप्त गरेको छ। यससँगै, बैंकले विभिन्न राष्ट्रिय तथा अन्तर्राष्ट्रिय संस्थाबाट पनि विशेष सम्मान प्राप्त गरेको जानकारी दिइएको छ।

ग्लोबल आइएमई बैंक देशभरिका ७७ वटै जिल्लामा शाखा सञ्जाल भएको पहिलो निजी क्षेत्रको वाणिज्य बैंक हो। बैंकका ३५४ शाखा कार्यालय, ३८४ एटिएम, २५५ शाखारहित बैंकिङ सेवा, ६८ एक्सटेन्सन तथा राजस्व संकलन काउन्टर र ३ वटा वैदेशिक प्रतिनिधि कार्यालयसहित १,१०० भन्दा बढी सेवा केन्द्रमार्फत ग्राहकलाई उत्कृष्ट सेवा प्रदान गर्दै आएको छ।

बैंकले रेमिट्यान्स सेवामार्फत नेपाली नागरिकहरूलाई विश्वभरबाट आर्थिक सेवा उपलब्ध गराउँदै नेपालमा आर्थिक समृद्धिमा योगदान पुर्याइरहेको छ। अमेरिका, बेलायत, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत र जोर्डनजस्ता देशहरूबाट रेमिट्यान्स सेवा सञ्चालन गर्दै नेपालमा योगदान गर्दै आएको छ।