जापानको पहिलो महिला प्रधानमन्त्री बनीन् ताकाइची

काठमाडौँ । जापानको संसदले मंगलबार साने ताकाइचीलाई देशकी पहिलो महिला प्रधानमन्त्रीका रूपमा निर्वाचित गरेको छ, जसले जापानको पितृसत्तात्मक राजनीतिक इतिहासमा नयाँ अध्यायको सुरुवात गरेको छ।

६४ वर्षीया ताकाइची, जो ओसाका नजिकैको नारा शहरमा हुर्केकी हुन्, पहिल्यै हेभी मेटल ड्रमर र मोटरसाइकलप्रेमीका रूपमा चिनिन्थिन्। उनी टेलिभिजन प्रस्तुतकर्ताबाट देशको उच्च राजनीतिक पदसम्म पुग्ने दुर्लभ उदाहरण बनेकी छन्।

पूर्व प्रधानमन्त्री शिन्जो आबेकी नजिककी अनुयायी मानिने ताकाइचीले आबेको जस्तै रूढीवादी विचारधारा अँगालेकी छिन्। उनले जापानको शान्तिवादी संविधान संशोधन गर्नुपर्ने र दोस्रो विश्वयुद्धमा दोषी ठहरिएका सैनिकहरूको नाम रहेको विवादास्पद युद्ध स्मारक भ्रमण गर्ने आफ्नो अडान दोहोर्याएकी छन्।

अर्थतन्त्र कमजोर हुँदै गएको र राजनीति अस्थिर बनेको समयमा नेतृत्व सम्हालेकी ताकाइचीले देशभित्र स्थायित्व ल्याउने चुनौती सामना गर्नुपर्नेछ। उनी पदमा आरूढ भएको केही दिनमै अमेरिकी राष्ट्रपति डोनाल्ड ट्रम्प जापान भ्रमणमा आउने तय भएको छ।

ताकाइची २०२० पछि जापानको चौथो प्रधानमन्त्री बनेकी छन्, जसले देशको राजनीतिक अस्थिरतालाई पनि उजागर गर्छ।