सामाजिक सञ्जाल नियमन विधेयक सुझावका आधारमा परिमार्जन गरिने: प्रदीप ज्ञवाली

काठमाडौँ – नेकपा (एमाले)का कार्यवाहक महासचिव प्रदीप ज्ञवालीले सामाजिक सञ्जाल सञ्चालन, प्रयोग तथा नियमनसम्बन्धी विधेयक संसदीय छलफल र सञ्चारक्षेत्रका सुझावका आधारमा परिमार्जन गरिने बताएका छन्।

प्रेस चौतारी नेपाल ललितपुरको छैटौँ जिल्ला अधिवेशन उद्घाटन गर्दै उनले सामाजिक सञ्जाललाई मर्यादित बनाउन आवश्यक परेकाले विधेयक ल्याउन लागिएको स्पष्ट पारे। ज्ञवालीका अनुसार, सामाजिक सञ्जाल स्वच्छ मनोरञ्जन र तथ्यमा आधारित सूचना आदानप्रदानको माध्यम बन्नुपर्छ। उनले भनेका छन्, “आलोचनाको अधिकार सबैलाई भए पनि जिउँदो व्यक्तिलाई श्रद्धाञ्जली दिने जस्ता कार्यहरू स्वीकार्य हुन सक्दैनन्।”

कार्यवाहक महासचिव ज्ञवालीले एमाले प्रेस स्वतन्त्रताको पक्षधर रहेको उल्लेख गर्दै लोकतन्त्रले जनताको जीवनमा सकारात्मक परिवर्तन ल्याउनु पर्नेमा जोड दिए।

कार्यक्रममा प्रेस चौतारी नेपालका उपाध्यक्ष राजेश राई र महासचिव हिरामान लामाले सामाजिक सञ्जाललाई व्यवस्थित बनाउने क्रममा प्रेस स्वतन्त्रता कुण्ठित हुनु नहुने बताएका छन्।

यस अधिवेशनले नवीन लुईंटेलको अध्यक्षतामा १३ सदस्यीय नयाँ कार्यसमिति चयन गरेको छ। कार्यक्रममा नेपाल प्रेस डटकमका प्रधानसम्पादक मात्रिका पौडेल र सञ्चारकर्मी विष्णु कल्पितलाई प्रेस चौतारी क्रियाशील पत्रकारिता पुरस्कार प्रदान गरिएको थियो।