ढाकामा शृंखलाबद्ध बम विस्फोट, सहर उच्च सतर्कतामा

एजेन्सी । भारत र पाकिस्तानका राजधानीमा विस्फोट भएपछि अब बंगलादेशको राजधानी ढाकामा पनि बम विस्फोट भएका छन्। अन्तर्राष्ट्रिय सञ्चारमाध्यमका अनुसार ढाकाका विभिन्न ठाउँमा पटक–पटक बम पड्काइएका छन्। अहिले सम्म मानवीय क्षतिको ठ्याक्कै विवरण आएको छैन, तर सहरमा त्रास फैलिएको छ।

बंगलादेशी समाचार माध्यम द डेली स्टार का अनुसार, मंगलबार मात्रै ११ स्थानमा विस्फोट भएका छन्। ती सबैमा घरेलु रूपमा बनाइएका सामान्य (क्रुड) बम प्रयोग गरिएको बताइन्छ। ढाकाका सरकारी कार्यालय, धार्मिक स्थल र सार्वजनिक यातायातलाई मुख्य लक्ष्य बनाइएको छ।

पहिलो विस्फोट बिहान करिब साढे ३ बजे अन्तरिम सरकार प्रमुख मोहम्मद युनुसले स्थापना गरेको ग्रामीण बैंकको मुख्यालय अगाडि भएको थियो। दुई जना व्यक्तिले मोटरसाइकलमा आएर बम फ्याँकेर भागेको प्रहरीले जनाएको छ। त्यसपछि जिल्ला अदालत अगाडि रोकिएको प्रहरी भ्यानमा भएको अर्को विस्फोटमा २७ जना घाइते भएका छन्।

त्यसपछि ‘प्रवर्तन’ नामक संस्थामा र धानमण्डी क्षेत्रका इब्न सिन्हा अस्पताल र मिडास सेन्टर नजिक पनि बम विस्फोट भएका छन्। केही बसमा आगजनी समेत भएकाले ढाका सहर अहिले उच्च सतर्कतामा राखिएको छ।