दुर्गम जिल्लामा प्रतिकेजी ९ रुपैयाँमै नुन वितरण भइरहेको छ: साल्ट ट्रेडिङ

काठमाडौं । साल्ट ट्रेडिङ कर्पोरेशन लिमिटेडकी प्रमुख कार्यकारी अधिकृत उर्मिला श्रेष्ठले नेपाल सरकारबाट प्राप्त ढुवानी अनुदानका कारण दुर्गम जिल्लाहरूमा नुन प्रतिकेजी नौ रुपैयाँमै वितरण भइरहेको स्पष्ट गर्नुभएको छ।

संघीय संसदको उद्योग, वाणिज्य तथा श्रम र उपभोक्ता हित समितिको बिहीबारको बैठकमा बोल्दै श्रेष्ठले कर्पोरेशनले ढुवानी अनुदान प्राप्त दुर्गम क्षेत्रका लागि मात्र सहुलियत दरमा नुन वितरण गरिरहेको बताउनुभयो।

उहाँले भनिन्, “हामीले ढिके नुन, सिधे नुन, आयो नुन, जनशक्ति नुन र भानु नुनजस्ता उत्पादनहरू नेपाल सरकारले ढुवानी अनुदान दिएको दुर्गम जिल्लाहरूमा मात्र वितरण गरिरहेका छौं। त्यहाँ नुनको मूल्य प्रतिकेजी ९ रुपैयाँ कायम गरिएको छ। बाँकी क्षेत्रमा भने कर्पोरेशनले नै क्षति व्यहोर्दै आएको छ।”

श्रेष्ठका अनुसार विक्री वितरणमा ल्याइने नुन भारत सरकारको मापदण्डअनुसार प्रयोगशालामा परीक्षण गरिसकेपछि मात्र बजारमा पठाइने गरिएको छ।

बैठकमा आयोडिनयुक्त गुणस्तरीय नुनको सहज र सुलभ आपूर्ति सुनिश्चित गर्नुपर्ने विषयमा व्यापक छलफल भएको थियो। समितिले नुनको गुणस्तर, मूल्य नियन्त्रण र दुर्गम क्षेत्रसम्मको आपूर्ति सुदृढ बनाउनेतर्फ सम्बन्धित निकायको ध्यानाकर्षण गराएको छ।