शिक्षामा आमूल परिवर्तन आवश्यक: प्रधानमन्त्री ओली

काठमाडौँ — प्रधानमन्त्री तथा काठमाडौँ विश्वविद्यालयका कुलपति केपी शर्मा ओलीले शिक्षालाई आधुनिक प्रविधिमैत्री, जीवनोपयोगी र रोजगारमुखी बनाउनु आवश्यक रहेको बताएका छन्।

प्रधानमन्त्री निवास बालुवाटारमा बिहीबार सम्पन्न काठमाडौँ विश्वविद्यालयसभाको ९९औँ बैठकलाई सम्बोधन गर्दै उनले रोजगारी सिर्जना गर्न सक्ने खालको जनशक्ति उत्पादनमा विश्वविद्यालयले ध्यान दिनुपर्नेमा जोड दिए। प्रधानमन्त्री ओलीले काठमाडौँ विश्वविद्यालयले यस दिशामा गर्दै आएका प्रयासहरूलाई सकारात्मक कदमको रूपमा उल्लेख गरे।

स्वास्थ्य शिक्षासम्बन्धी पहुँच विस्तार र छात्रवृत्तिको समायोजन आवश्यक रहेको उल्लेख गर्दै उनले ७५ प्रतिशत छात्रवृत्ति सधैं चिकित्सा शिक्षामै केन्द्रित राख्नुभन्दा पुनरावलोकन गर्नुपर्ने धारणा व्यक्त गरे।

शिक्षा, विज्ञान तथा प्रविधि मन्त्री एवं सहकुलपति रघुजी पन्तले प्रधानमन्त्रीको चासोलाई कार्यान्वयनमा लैजान शिक्षा मन्त्रालय प्रतिबद्ध रहेको बताए। उनले नेपाललाई शैक्षिक हबका रूपमा विकास गर्न मन्त्रालयले दीर्घकालीन योजना अघि सारेको जानकारी दिए।

उपकुलपति प्रा. डा. अच्युतप्रसाद वाग्लेले विश्वविद्यालयले शिक्षणसँगै अनुसन्धानलाई समेत बल दिँदै अनुसन्धानात्मक विश्वविद्यालयको अवधारणा व्यवहारमा उतार्ने बताए।

बैठकले यही जेठ ३० गते धुलिखेलमा आयोजना हुने ३०औँ दीक्षान्त समारोह अन्तर्गत विभिन्न स्कुलका तहमा उपाधि हासिल गरेका ११२९ विद्यार्थीको ग्रेस लिस्ट स्वीकृत गरेको छ, जसमा ११८ जना विदेशी विद्यार्थी पनि समावेश छन्।

रजिष्ट्रार प्रा. डा. राजीव श्रेष्ठद्वारा प्रस्तुत चार अर्ब तीन करोड ८० लाख रुपैयाँको अनुमानित बजेट पारित गरिएको छ। साथै, गत आर्थिक वर्षको लेखापरिक्षण प्रतिवेदन तथा चालु वर्षको कार्यप्रगति प्रतिवेदन समेत स्वीकृत गरिएको छ।

सभाले विश्वविद्यालय सभा सदस्यका रूपमा विभिन्न क्षेत्रबाट व्यक्तित्वहरूलाई मनोनयन गर्ने निर्णय पनि गरेको छ। मनोनयनमा रत्ना कोइराला, प्रा. डा. दिव्या सिंह, डा. रीता थापा, प्रा. डा. ध्रुवकुमार गौतम, डा. अनन्तप्रसाद अधिकारी र डा. विकास अधिकारी परेका छन्।

सभाले काठमाडौँ विश्वविद्यालय र धुलिखेल अस्पतालबीचको भावी सहकार्यसम्बन्धी प्रस्ताव समेत पारित गरेको छ। सहकार्य स्पष्ट पार्न गठित सहजीकरण समितिको प्रतिवेदन, जसको संयोजक राष्ट्रिय योजना आयोगकी सदस्य गीताकुमारी पौड्याल अधिकारी थिइन्, उक्त प्रतिवेदन पारित गरिएको हो।

नयाँ सहकार्य ढाँचाअनुसार, यदि दुई संस्थामध्ये कुनै पनि अलग हुन चाहेमा कम्तीमा ६ वर्षअघिदेखि जानकारी गराउनुपर्ने व्यवस्था गरिएको छ।

सभाको अन्त्यमा प्रधानमन्त्री ओलीले ‘काठमाडौँ विश्वविद्यालय: पहिलो २५ वर्ष’ नामक पुस्तकको पहिलो र दोस्रो भाग विमोचन गरे। पुस्तकका लेखक तथा विश्वविद्यालयका संस्थापक रजिष्ट्रार डा. सीताराम अधिकारी हुन्।

प्रधानमन्त्री ओलीले शून्यबाट सुरु भएको प्रयासमार्फत स्थापित काठमाडौँ विश्वविद्यालयको इतिहासलाई दस्तावेजीकरण गर्नु भविष्यका पुस्ताका लागि प्रेरणादायी हुने बताए।