समानुपातिकतर्फको मतपत्र छपाइ सम्पन्न,प्रत्यक्षतर्फको मतपत्र छपाइ सुरु

काठमाडौँ । आगामी फागुन २१ गते हुने प्रतिनिधिसभा निर्वाचनका लागि समानुपातिक निर्वाचन प्रणालीतर्फको मतपत्र छपाइ कार्य सम्पन्न भएको छ। निर्वाचन आयोगका अनुसार जनक शिक्षा सामग्री केन्द्र लिमिटेड, सानोठिमीमा सोमबार समानुपातिकतर्फ दुई करोड आठ लाख ५० हजार प्रति मतपत्र छपाइ पूरा गरिएको हो।

निर्वाचन आयोगका प्रमुख निर्वाचन आयुक्त रामप्रसाद भण्डारीले समानुपातिक प्रणालीका मतपत्र आगामी फागुन ५ गतेभित्र सबै निर्वाचन क्षेत्रमा पठाइसक्ने तयारी रहेको जानकारी दिनुभयो। आयोगले तोकिएको समयसीमाभित्र मतपत्र ढुवानी सम्पन्न गर्ने योजना बनाएको जनाएको छ।

यससँगै प्रतिनिधिसभा निर्वाचनका लागि प्रत्यक्षतर्फको मतपत्र छपाइ कार्य पनि सुरु गरिएको छ। सोमबार प्रमुख निर्वाचन आयुक्त भण्डारीसहित निर्वाचन आयोगका अधिकारीहरू जनक शिक्षा सामग्री केन्द्र पुगेर प्रत्यक्षतर्फको मतपत्र छपाइ प्रक्रियाको निरीक्षणमा सहभागी भएका थिए।

निरीक्षणपछि सञ्चारकर्मीसँग कुरा गर्दै प्रमुख निर्वाचन आयुक्त भण्डारीले प्रत्यक्षतर्फ दुई करोड तीन लाख २३ हजार मतपत्र छपाइ सुरु गरिएको जानकारी दिनुभयो। उहाँका अनुसार उक्त छपाइ कार्य करिब १५ दिनभित्र सम्पन्न हुने अपेक्षा गरिएको छ।

प्रमुख निर्वाचन आयुक्त भण्डारीले मतदान अघि मतपत्रको सुरक्षा व्यवस्थासहित निर्वाचनका सम्पूर्ण तयारी अन्तिम चरणमा पुगेको उल्लेख गर्नुभयो। यसअघि जनक शिक्षा सामग्री केन्द्रले प्रत्यक्षतर्फ करिब ११ लाख नमूना मतपत्र छपाइ गरी निर्वाचन आयोगलाई बुझाइसकेको छ।