गृहमन्त्री लामिछानेले लगाएका आरोपहरूको जबाफ प्रधानमन्त्रीले दिनुपर्छ : गगन थापा

काठमाडौँ, जेठ २० । नेपाली कांग्रेसले संसदमा गृहमन्त्री रवि लामिछानेले बोलेका अभिव्यक्तिमाथि अब प्रधानमन्त्री पुष्पकमल दाहाल प्रचण्डसँग जबाफ माग्ने बताएका छन्। आइतबार प्रतिनिधि सभामा विशेष समय लिएर बोल्दै कांग्रेसका महामन्त्री गगन थापाले गृहमन्त्री लामिछानेले लगाएका आरोपहरूको जबाफ प्रधानमन्त्रीले नै दिनुपर्ने बताएका छन् ।

थापाले गृहमन्त्रीका अभिव्यक्ति स्वामित्व लिन वा रेकर्डबाट हटाउन प्रधानमन्त्रीलाई आग्रह गरेका छन्।थापाले भने , ‘जुन कुरा यहाँ भनियो, सुनियो त्यो कि प्रधानमन्त्रीले स्वामित्व लिनुस्, तपाईंसँगै हिसाबकिताब गरौंला, कि होइन भने प्रधानमन्त्री आउनुस् र भन्नुस् म यसलाई रेकर्डबाट हटाउँछु भनेर। होइन भने प्रधानमन्त्रीसँग हिसाब त लिइन्छ, यही सदनमा लिइन्छ। सभामुखको अगाडि नै लिइन्छ।’

थापाले सहकारी संस्था वचत रकम संसदीय छानबिन विशेष समितिले उपप्रधानमन्त्री तथा गृहमन्त्री रवि लामिछानेमाथि पनि छानबिन गर्ने बताएका छन्। सूर्यदर्शन सहकारीलगायतका सहकारीबाट गोर्खा मिडियाले लिएको रकम अपचलन अभियोगमा समितिले गृहमन्त्री लामिछानेलाई पनि बयानमा बोलाएर कारबाहीका लागि सिफारिस गर्नुपर्ने उनको माग समेत रहेको छ ।