नेपाल शैक्षिक परामर्श संघ (इक्यान) द्वारा भ्रामक विज्ञापन र अनधिकृत प्रचारप्रसारको सम्बन्धमा जारी गरेको सूचना

नेपाल शैक्षिक परामर्श संघ (इक्यान) को अनुशासन विभागले शिक्षा परामर्श क्षेत्रलाई मर्यादित, विश्वासनीय र पारदर्शी बनाउनका लागि विशेष निर्देशन जारी गरेको छ। संघले आफ्नो आचारसंहिता २०६३ र शिक्षा मन्त्रालयको परामर्श सेवा संचालन निर्देशिका २०७३ अनुसार सबै सदस्यहरूले मापदण्ड र नीतिहरूलाई पालना गर्न अत्यावश्यक रहेको बताएको छ।

संघले सदस्यहरूलाई विशेष रूपमा भ्रामक विज्ञापन र अनधिकृत प्रचारप्रसारबाट बच्न आग्रह गर्दै केही प्रमुख निर्देशनहरू प्रस्तुत गरेको छ।

१. भ्रामक विज्ञापन नगर्नु
संघले कुनै पनि झुटा, भ्रामक, या भड्काउने विज्ञापन नगर्नुपर्ने कुरा स्पष्ट गरेको छ। “भिसा ग्यारेन्टी”, “एडमिशन ग्यारेन्टी” जस्ता कुनै प्रकारका ग्यारेन्टी सम्बन्धी प्रचार गर्ने गतिविधिमा संलग्न हुने कुरा कडा रूपमा निषेध गरिएको छ। विज्ञापन गर्दा सधैं प्रमाणित र सत्य जानकारी मात्र प्रस्तुत गर्नुपर्नेछ भन्ने बताइएको छ।

२. वर्किङ भिसा प्रचारमा पूर्ण प्रतिबन्ध
संघले वर्किङ भिसासँग सम्बन्धित कुनै पनि प्रकारको प्रचारप्रसार गर्न पूर्ण प्रतिबन्ध लगाएको छ। सदस्यहरूलाई यस प्रकारको गतिविधिमा संलग्न नहुन र कुनै असमान्य वा अनधिकृत भिसा प्रचार नगर्न सर्त गरिएको छ। यदि यस्तो गतिविधि पाइएमा, नेपाल शैक्षिक परामर्श संघ (इक्यान) का नियमावली अनुसार आवश्यक कारबाही गरिने छ।

३. सामाजिक उत्तरदायित्वको पालन
संघले सदस्यहरूलाई विद्यार्थी र अभिभावकलाई सही, प्रमाणिक र स्पष्ट जानकारी प्रदान गर्न पनि विशेष ध्यान दिन अनुरोध गरेको छ। यस्तै, शहरी सौन्दर्यलाई मध्यनजर गर्दै जथाभावी पोस्टर टाँस्ने वा पम्प्लेट वितरण नगर्नुपर्ने उल्लेख गरिएको छ।

नेपाल शैक्षिक परामर्श संघ (इक्यान) ले यसरी नै इमानदारी, पारदर्शिता र जिम्मेवारीको पालनाले शिक्षा परामर्श क्षेत्रको सफलता र प्रतिष्ठाको आधार बनाउने विश्वास व्यक्त गरेको छ। संघले सबै सदस्यलाई यस कार्यमा सहयोग र समर्थन गर्न आह्वान गर्दै, क्षेत्रलाई अझ व्यवस्थित, मर्यादित र विश्वासनीय बनाउने अभियानलाई सँगै अघि बढाउन अनुरोध गरेको छ।