नेपाल टेलिकम : सञ्चालन आयमा सामान्य सुधार

नेपाल टेलिकमले चालु आर्थिक वर्षको दोस्रो त्रैमासिकसम्मको वित्तीय विवरण सार्वजनिक गर्दा कम्पनीको सञ्चालन आयमा सामान्य सुधार आए पनि खुद मुनाफामा भने ठूलो गिरावट देखिएको छ। कम्पनीको खुद मुनाफा १२.९८ प्रतिशतले घटेर रु. ४ अर्ब १६ करोड ४५ लाख ९ हजारमा झरेको छ। यस अवधिमा कम्पनीको प्रतिशेयर आम्दानी रु. ४६.२७ कायम भएको छ।

कम्पनीको कुल सञ्चालन आय १.७३ प्रतिशतले बढेर रु. १७ अर्ब २९ करोड ९७ लाख ३० हजार पुगेको छ। तर, कुल आय भने १.५ प्रतिशतले घटेको छ। यसले कम्पनीको गैर–सञ्चालन आयमा समस्या देखिएको संकेत गर्छ। विशेषगरी व्याज आय र अन्तरआवद्धता आयमा आएको भारी गिरावटले कम्पनीको समग्र आयमा नकारात्मक असर परेको हो।

कम्पनीको अन्तरआवद्धता आय गत आवको तुलनामा ६.१४ प्रतिशतले घटेको छ। इन्टरनेट सेवाको व्यापकताले भ्वाइस कलको परिमाण घटाउँदा यस्तो आयमा गिरावट आएको कम्पनीको भनाइ छ। यसले टेलिकमको परम्परागत आयको स्रोत क्रमशः सुक्दै गएको देखाउँछ।

अर्कोतर्फ, बैंक तथा वित्तीय संस्थामा गरेको लगानीको मूल्य अभिवृद्धि र ब्याज दर घट्दा व्याज आयमा भने ३२ प्रतिशतले ठूलो गिरावट आएको छ। यसले कम्पनीले आफ्नो अधिशेष पुँजीको व्यवस्थापन र प्रतिफल दरमा पुनर्विचार गर्नुपर्ने देखाएको छ।

कम्पनीको अर्को चुनौती भनेको लागत व्यवस्थापन देखिएको छ। कर्मचारी खर्चमा ११.५५ प्रतिशतले वृद्धि हुनु र इम्पेयरमेन्ट खर्चमा रु. १८.३५ करोडले थपिनुले कम्पनीको सञ्चालन मार्जिनमा चाप परेको छ। नेपाल लेखामान १९ अनुसारको पेन्सन दायित्व गणनाको लागि औसत छुट दर घटाइँदा कर्मचारी खर्च थप बढेको हो।

राष्ट्रको सञ्जाल विस्तारको दायित्वले विकट क्षेत्रमा लागत बढ्दा पनि राजश्वमा सकारात्मक प्रभाव नपरेको कम्पनीको भनाइ छ। सेवाको दररेट नीतिमा भएको परिवर्तनले समेत राजश्व वृद्धिमा बाधक बनेको छ।

चालु करतर्फ भने कम्पनीको दायित्व ५५.५६ प्रतिशतले बढेको छ। गत आवमा विगतको करयोग्य नोक्सानी समायोजन गरी गणना गरिएकाले चालु कर कम देखिएको थियो। यस वर्ष भने त्यस्तो समायोजन नहुँदा चालु करको भार बढेको हो।

यसैगरी, विदेशी मुद्राको सटही दरमा भएको परिवर्तनका कारण कम्पनीले विदेशी मुद्रा सटही नाफामा भने १५०% प्रतिशतले उछाल हासिल गरेको छ। यसले समग्र वित्तीय विवरणमा केही राहत पुर्याए पनि मुनाफाको ठूलो गिरावटलाई भने समेट्न नसकेको देखिन्छ।