नेपाल टेलिकमले दसैं–तिहार–छठ अफर २०८२ सार्वजनिक, आकर्षक डाटा र भ्वाइस प्याकेज उपलब्ध

काठमाडौं। नेपाल टेलिकमले नेपालीहरूको महान् चाड दसैं, तिहार र छठको अवसरमा आफ्ना ग्राहकहरूको लागि विशेष दसैं–तिहार–छठ अफर २०८२ सार्वजनिक गरेको छ। कम्पनीले एफटीटीएच जडानदेखि मोबाइल सेवासम्म विभिन्न सहुलियत दरका प्याकेज उपलब्ध गराएको छ।

कम्पनीले जानकारी दिएअनुसार, असोज ६ गतेदेखि ३१ गतेसम्म नयाँ एफटीटीएच प्याकेज जडान गर्ने ग्राहकहरूले जडान शुल्क (रु. ५००) मिनाहा पाउनेछन्। यसले नयाँ प्रयोगकर्तालाई डिजिटल सेवामा थप सहजता ल्याउने अपेक्षा गरिएको छ।

मोबाइल सेवामा समेत आकर्षक प्याकेज ल्याइएको छ। जीएसएम सेवाका ग्राहक का लागि रु. ४९९ मा ५ जीबी फेस्टिभल अनलिमिटेड र रु. ६९९ मा १० जीबी फेस्टिभल अनलिमिटेड प्रिमियम डाटा प्याकेज उपलब्ध हुनेछन्। Fair Usage Policy (FUP) अनुसार ५ जीबी वा १० जीबी डाटा प्रयोग भइसकेपछि क्रमशः २ एमबीपीएस र ३ एमबीपीएस गतिमा बाँकी अवधि अनलिमिटेड डाटा प्रयोग गर्न सकिनेछ।

यसैगरी, टेलिकमले भ्वाइस र म्यासेज सेवामा पनि अफर ल्याएको छ। रु. २५० मा १००० मिनेट अल–नेट भ्वाइस सुविधा दिने जॉयफुल मिनेट्स र रु. ९९ मा १००० अन–नेट एसएमएस दिने फेस्टिभ म्यासेज प्याकेज समेत सञ्चालनमा ल्याइएको छ। यी प्याकेज प्रिपेड प्रयोगकर्ताका लागि २८ दिन र पोस्टपेड प्रयोगकर्ताका लागि ३० दिन लागू हुनेछन्।

उक्त प्याकेजहरू असोज ६ देखि २० गतेसम्म र कार्तिक १ देखि १० गतेसम्म खरिद गर्न सकिने व्यवस्था गरिएको छ। ग्राहकहरूले आफ्नो मोबाइलबाट *1415*11# डायल गरेर वा नेपाल टेलिकम एप प्रयोग गरेर यी प्याकेज सहजै खरिद गर्न सक्नेछन्।

नेपाल टेलिकमले पर्वहरूमा उपलब्ध गराइने अफरहरूले प्रयोगकर्तालाई चाडपर्वमा आफन्तसँग अझ नजिक ल्याउने, खुशी बाँड्ने र डिजिटल सेवाको पहुँच बढाउने विश्वास व्यक्त गरेको छ। कम्पनीले आफ्ना ग्राहकहरूलाई आधुनिक प्रविधिको सहज पहुँच उपलब्ध गराउने प्रतिबद्धता पनि दोहोर्याएको छ।