प्राविधिक समस्याका कारण नासाको आर्टिमिस २ चन्द्र मिशन तत्कालका लागि स्थगित

काठमाडौँ । नासाले लामो समयदेखि प्रतीक्षा गरिएको चन्द्र अभियानको प्रक्षेपण मिति मार्च ६ अब सम्भव नदेखिएको जनाएको छ। नासाका प्रशासक जारेड आइज्याकम्यानले प्राविधिक समस्याका कारण आगामी मार्चमा हुने भनिएको ‘आर्टिमिस २’ चन्द्र मिशन तत्कालका लागि स्थगित गरिएको घोषणा गरेका छन् । नियमित जाँचका क्रममा अन्तिम समयमा केही प्राविधिक समस्या देखिएपछि प्रक्षेपण रोकिएको हो। नासाका अनुसार आर्टेमिस II मिशन केही हप्ताभित्र प्रक्षेपणका लागि तयार हुन सक्छ, तर अहिले थप मर्मत र जाँच आवश्यक छ।

यस मिशनमार्फत ५० वर्षपछि पहिलो पटक मानिसहरूलाई चन्द्रमातर्फ पठाउने योजना छ। चार अन्तरिक्ष यात्रीलाई करिब १० दिनको यात्रामा चन्द्रमाको टाढाको भागसम्म लगिनेछ, जसले अहिलेसम्मकै सबैभन्दा टाढाको मानव अन्तरिक्ष यात्रा हुनेछ।

नासाका प्रशासक जेरेड आइज्याकम्यानले प्रक्षेपण ढिलाइले मानिस निराश भएको स्वीकार गरे पनि सुरक्षामा कुनै सम्झौता नगर्ने बताए। परीक्षणका क्रममा रकेटमा प्रयोग हुने हेलियमको प्रवाहमा समस्या देखिएको हो, जसलाई गम्भीर प्राविधिक समस्या मानिन्छ।

यो सबै परीक्षण फ्लोरिडाको केनेडी स्पेस सेन्टरमा भइरहेको थियो। रकेटमा लाखौँ ग्यालन इन्धन भरिए पनि अन्तिम समयमा समस्या देखिएपछि प्रक्षेपण रोकिएको हो।

यस मिशनमा अमेरिकी अन्तरिक्ष यात्री रीड वाइजम्यान, भिक्टर ग्लोभर, क्रिस्टिना कोच र क्यानडाका जेरेमी हान्सेन सहभागी हुनेछन्। यदि यो अभियान सफल भयो भने, भविष्यमा मानिसलाई चन्द्रमामा उतार्ने अर्को मिशनका लागि बाटो खुल्ने नासाले जनाएको छ।